Կանադացիները երբեք չեն հրաժարվի աշխարհի լավագույն երկրից՝ ԱՄՆ-ին միանալու համար. Կանադայի նախկին վարչապետը՝ Թրամփին
ՄԻՋԱԶԳԱՅԻՆ
Կանադացիները գնահատում են իրենց անկախությունը և տեղի չեն տա սպառնալիքներին ու վիրավորանքներին, որպեսզի միանան ԱՄՆ-ին. այս մասին Globe and Mail պարբերականի համար գրած սյունակում նշել է Կանադայի նախկին վարչապետ Ժան Կրետիենը՝ հակադարձելով ԱՄՆ նորընտիր նախագահ Դոնալդ Թրամփի հավակնություններին:
«Դոնալդ Թրամփ, դիմում եմ ինչպես ծերուկը ծերուկին. խելքի եկեք, ի՞նչն է Ձեզ ստիպում մտածել, որ կանադացիները երբևէ կհրաժարվեն աշխարհի լավագույն երկրից և կմիանան ԱՄՆ-ին», -ընդգծել է նա։
Կրետիենը հիշեցրել է, որ Կանադան ԱՄՆ-ից շուտ երկու անգամ մտել է համաշխարհային պատերազմների մեջ և զգալի կորուստներ է ունեցել, և բացի այդ, երկիրը «քաջություն է ունեցել» մերժել Վաշինգտոնին, որը ցանկանում էր Կանադան ներքաշել «Իրաքի անհիմն և ապակայունացնող պատերազմում»։
Ավելի վաղ Թրամփը հայտարարել էր, որ կանադացիներից շատերն իբր հանդես են գալիս, որպեսզի իրենց երկիրը դառնա ԱՄՆ 51-րդ նահանգը։ Նա կարծում է, որ նման միավորումը Կանադային տնտեսական կայունություն կբերի և կպաշտպանի այն արտաքին սպառնալիքներից, որոնք, ըստ նորընտիր նախագահի, գալիս են «ռուսական և չինական նավերից»։
