Սանկտ Պետերբուրգից մի կին պատմել է Երևանում հանգստի դրական և բացասական կողմերի մասին
ՏՆՏԵՍՈՒԹՅՈՒՆ
Պետերբուրգի մի բնակչուհի որոշել է արձակուրդն ու ծննդյան տարեդարձն անցկացնել Հայաստանում, ընդամենը երեք օր, գրում է peterburg2.ru-ն։ Նևայի վրա գտնվող քաղաքից Երևան կարելի է հասնել Մոսկվայի տրանսֆերտով: Ճիշտ է, աղջիկը երկար չի մնացել Հայաստանի մայրաքաղաքում, նա ժամանել է ճաշի ժամին, տեղավորվել հյուրանոցում և հաջորդ առավոտ գնացել Տաթևի վանք, որի հեռավորությունը Երևանից մեքենայով 4-5 ժամ է։ Երկու օր անց նա կրկին վերադարձել է Հայաստանի մայրաքաղաք։
Սանկտ Պետերբուրգցի կնոջը շատ է տպավորել Տաթևի վանքը, հատկապես լեռների և ընդհանրապես բնության տեսարանների ֆոնին նրա հնագույն ճարտարապետությունը։ Հյուրանոցը եղել է հինգաստղանի՝ ինչպես Երևանում։ Ընդ որում հյուրանոցներից սպասելիքներն այն չեն եղել։ «Անհավանական գեղեցիկ լեռներ, եթե ճանապարհորդում ես Երևանից դուրս։ Ճիշտ է, հյուրանոցներում ինչ-որ տեղ ինձ կոլորիտը չի բավարարել, քանի որ բոլորն էլ ժամանակակից են: Ես նույնիսկ հատուկ ազգային ոճով հինգ աստղանի հյուրանոց փնտրեցի, բայց չգտա: Դիզայնային մոտեցում չկա, ստեղծել են այն, ինչը համարում են ժամանակակից։ Մի խոսքով, հյուրանոցներն ինձ ազգային ուրվագծերով չզարմացրին»,- ասել է ճանապարհորդը։
Ինքը՝ Երևանը, պետերբուրգցի կնոջը շատ բազմազան է թվացել։ Նրա խոսքով, Հայաստանի մայրաքաղաքը միասնական ոճ չունի: «Որպես պետերբուրգցի, դա իսկապես աչք գրավեց: Ինձ չթվաց, որ այն ինչ-որ կոլորիտային հայկական քաղաք է։ Ամեն ինչ սովորական է, մի տեղ հին թաղամաս է, մի տեղ ժամանակակից»,- նշել է աղջիկը։
Բայց ճանապարհորդը գնահատել է Երևանի ռեստորանները։ Նա ընդգծել է, որ այնտեղ գներն ավելի էժան են Սանկտ Պետերբուրգի համեմատ։ Այսպես, օրինակ, նա այցելել է մի հաստատություն, որը համարվում է մայրաքաղաքի ամենաթանկերից մեկը։ «Այնտեղ երեք հոգով 10 հազար ռուբլի ենք ծախսել։ Ուզածի չափ կերանք: Ամեն ինչը, որ ունեն, ավելի էժան է և պարզ: Այստեղ՝ Սանկտ Պետերբուրգում, այդ գումարով կարելի է նստել ամենասովորական ռեստորանում»,- ընդգծել է պետերբուրգցուհին։
Նրան շատ է դուր եկել էքսկուրսիան դեպի Երևանի Կոնդ թաղամաս: Տեղի բնակիչներն ասում են, որ այդ տարածքին վերանորոգում է սպասում։ «Դա ուղղակի Երևանի տնակային թաղամասն է։ Ինձ համար այդ վայրը հետաքրքիր էր, բավականին գունեղ»,- իր տպավորություններով է կիսվել ճանապարհորդուհին։
Երևանում մեկ այլ հակադրություն եղել է մայթերի բացակայությունը և ոչ բարեկարգ ճանապարհների առկայությունը, որոնցով հաճախ են շարժվում Tesla-ի էլեկտրական մեքենաները։ Նրան դուր չի եկել նաև այն, որ Հայաստանի մայրաքաղաքում գրեթե ամեն քայլափոխի կարելի է գտնել շքեղ ապրանքանիշերի բազմաթիվ կեղծիքներ։ Սանկտ Պետերբուրգի տիկնոջ խոսքով Երևանում լավ բան գնելը բավականին դժվար է, քանի որ «էժանները» շատ են։ Այդ իսկ պատճառով ճամփորդությունը չի ներառել գնումներ, քանի որ ժամանակը քիչ էր որակյալ կամ իսկապես բրենդային հագուստ փնտրելու համար։ Մեկ այլ մինուս եղել է անձնակազմի անուշադրությունը։ Երևանում աղջիկը, ի թիվս այլոց, որոշել է նշել ծննդյան տարեդարձը։ Աշխատանքից հատուկ արձակուրդ է վերցրել, այնուամենայնիվ, տոնակատարության հետ կապված ամեն ինչ հարթ չի անցել: «Չնայած այն հանգամանքին, որ հայերը հյուրընկալ են, նրանք անուշադիր են խնդրանքների նկատմամբ։ Ընկերը խնդրել էր հինգ աստղանի հյուրանոցի աշխատակիցներին նախօրոք տոնակատարություն կազմակերպել՝ ներառյալ տորթ, բայց բոլորը հարմար կերպով մոռացել էին դրա մասին։ Արդյունքում էժան տորթով են դուրս եկել իրավիճակից»,- դժգոհել է աղջիկը։
Արձակուրդի գները
Պարտադիր ծախսերի թվում էր, իհարկե, չվերթը Սանկտ Պետերբուրգից Երևան և հակառակ ուղղությամբ։ Պետերբուրգցի կինը տոմսերի համար վճարել է 50 հազար ռուբլի։ Այնուամենայնիվ, արժե հաշվի առնել այն, որ ուղևորությունն ընկել է նոյեմբերյան արձակուրդներին, ուստի գները սովորականից մի փոքր բարձր են եղել: Տաթև հասնելու համար մեկ անձի համար ևս 14 հազար ռուբլի է ծախսվել։
Ընդհանուր առմամբ, ամբողջ ճանապարհորդությունը՝ ներառյալ Տաթևի վանք, ընտանեկան գինեգործարան այցելությունները, էքսկուրսիան Կոնդի տարածք, ռեստորանները, հյուրանոցները, սնունդը և այլն, արժեցել է 130 հազար ռուբլի։
Ընդհանուր առմամբ, Սանկտ Պետերբուրգի բնակչուհին շատ գոհ է մնացել իր արձակուրդից: Նա առանձնահատուկ ընդգծել է, որ Հայաստանի բնությունը գեղեցիկ է, սակայն բուն Երևանը, այնքան էլ չի տպավորել աղջկան։ Նա հաստատ կվերադառնա այդ երկիր, բայց մայրաքաղաքում մեկ օրից ավել չի մնա։
Նյութը հրապարակման պատրաստեց Կամո Խաչիկյանը
