Այս պահի դրությամբ Սևանա լճի մակարդակը 1900,39 մետր է, որը նախորդ տարվա համեմատ, բարձր է 22 սմ-ով. Լևոն Ազիզյան
ՀԱՍԱՐԱԿՈՒԹՅՈՒՆ
2024 թվականը հիդրոլոգիական վիճակագրական տեսակետից, 2020 թվականից հետո եղած ամենաբարենպաստ տարին էր, և 2024 թվականի դեկտեմբերի 30-ի դրությամբ Սևանա լճի մակարդակը կազմում է 1900,39 մետր, որը նախորդ տարվա նույն օրվա համեմատությամբ բարձր է 22 սանտիմետրով, ընդ որում, տարեկան կտրվածքով սա վերջին ութ տարիների մակարդակի դրական փոփոխության ամենաբարձր արժեքն է:
Այս մասին հրավիրված ասուլիսին հայտարարել է Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը:
«Հունվարի մեկից մինչև հուլիսի 15-ը Սևանա լճի մակարդակը բարձրացել է 51 սանտիմետրով, այնուհետև մինչև դեկտեմբերի 30-ն իջել 29 սանտիմետրով: 2024 թվականի մայիսի 14-ից սկսած, Սևանա լճի մակարդակը նախորդ տարվա նույն օրվա մակարդակի համեմատած, ունեցել է դրական արժեք: Այդ համեմատական արժեքը բացասական էր դեռևս 2021 թվականի հունիսի 22-ից սկսած։ Արփա-Սևան ջրատարով Սևանա լճից տեղափոխվող ջրի քանակը 2024 թվականի հունվարի 1-ից դեկտեմբերի 29-ը ներառյալ կազմում է 185 միլիոն, որը 70,96 միլիոն խորանարդ մետրով ավելի է նախորդ տարվա նույն ժամանակահատվածի ցուցանիշից: Այն 2020 թվականից հետո դիտված ամենաբարձր ցուցանիշն է»,- ասաց Ազիզյանը։
Նրա խոսքով՝ 2024 թվականին Սևանա լճից ոռոգման նպատակով բացթողնված ջրի ծավալը եղել է վերջին 15 տարիների ամենափոքր արժեքը։
«Լճից բացթողումը սկսվել է հունիսի 16-ից և շարունակվել մինչև սեպտեմբերի 16-ը և բացթողնված ջրի գումարային ծավալը կազմել է 131 միլիոն, որը 9,2 միլիոնով պակաս է 2023 թվականի լճից բացթողնված ջրի գումարային ծավալից։ Այսօրվա դրությամբ շրջակա միջավայրի նախարարության հայ հիդրոմետրոպարկի կողմից դիտարկվող հինգ ջրամբարներում ջրի ծավալի գումարային մեծությունը կազմում է 392 միլիոն, որը 2023 թվականի նույն օրվա ցուցանիշից բարձր է 164 միլիոն խորանարդ մետրով։ 2024 թվականին Ազատի, Մարմարիկի, Ապարանի, Ախուրյանի ջրամբարների առավելագույն լցվածության արժեքները 2020 թվականից հետո ամենաբարձր արժեքներն էին, իսկ Արփա լճի պարագայում՝ վերջին 13 տարիների ամենաբարձր արժեքը»,- հայտնեց նա:
Նա նաև նշեց, որ 2024 թվականի մայիսի 24-ից 26-ը Հանրապետության ողջ տարածքում դիտվեցին ինտենսիվ անձրևներ, որոնց առավելագույն քանակը գրանցվեց մայիսի 25-ի երեկոյան ժամերին և 25-ից 26-ի լույս գիշերը։
«Ինտենսիվ տեղումներ են դիտվել հատկապես Լոռու Տավուշ հատվածում 40-ից 55 միլիմետր, որը կազմում է ամսական նորմայի 40-ից 60%-ը։ Շարունակաբար դիտված տեղումներով պայմանավորված՝ Դեբեդ և Աղստև գետերի ավազաններում դիտվեցին ջրի մակարդակի կտրուկ բարձրացումներ նախորդ օրվա համեմատ ավելի քան երկու մետրով, որի հետևանքով հեղեղվեցին շրջակա ափամերձ տարածքները՝ դառնալով, ցավոք սրտի, չորս մարդու մահվան պատճառ՝ զգալի վնաս պատճառելով հարակից բնակավայրերին, քանդվեցին կամուրջներ և այլ տնտեսական կորուստներ եղան»,- նշեց Ազիզյանը:
Նրա խոսքով՝ 2024 թվականի մայիսի 26-ին Դեբետ, Ձորագետ, Տաշիր գետերում դիտված առավելագույն ելքերն առավելագույն էին դիտարկումների ողջ պատմության մեջ, ընդ որում, նմանատիպ հեղեղումների կրկնման հավանականությունը կազմում է ավելի քան 100 տարին մեկ անգամ։
«2024 թվականն աչքի ընկավ նաև բավական խոնավ հուլիս ամսով, այս տարվա հուլիս ամիսը վերջին 58 տարիների ամենախոնավ հուլիս ամիսն էր և հուլիսի 27-28-ին ողջ Հանրապետությունում, հատկապես Տավուշի մարզում դիտվեցին հորդառատ տեղումներ, երկու օրվա ընթացքում ճամբարակում դիտվեց 77 մմ, Դիլիջանում՝ 54 մմ, Իջևանում՝ 53 մմ, որը կազմում է ամսական նորմայի 150%-ը, երկու օրվա ընթացքում թափվել էր ավելի քան 150%, ինչն Աղստև գետի հեղեղման պատճառ դարձավ՝ հանգեցնելով ափամերձ որոշ հատվածների հեղեղումներ, վնասելով Խաշտառակ գյուղը տանող կամուրջը։
Ընդ որում, հուլիսի 28-ին Աղստև գետի Իջևան հիդրոլոգիական դիտակետում դիտված առավելագույն ելքը հուլիս ամիսներին դիտված պատմական երկրորդ առավելագույն ելքն է եղել դիտարկումների ողջ պատմության ընթացքում»,- նշեց նա:
