Փորձագետը բացատրել է Ադրբեջանի սահմանների մոտ ՆԱՏՕ-ի ռազմական ենթակառուցվածքների առաջացումը
ՎԵՐԼՈՒԾՈՒԹՅՈՒՆՆԵՐ
Ադրբեջանը մնացել է Արևմուտքի կոկորդին, ներկայումս Հայաստանում տեղադրելով ՆԱՏՕ-ի ենթակառուցվածքները փորձ է արվում ճնշում գործադրել այդ հանրապետության վրա։ Այդ մասին Info24.ru-ի հետ զրույցում ասել է քաղաքագետ Յուրի Սվետովը։
Հիշեցնենք, որ ավելի վաղ Ադրբեջանի նախագահ Իլհամ Ալիևը հայտարարել էր, որ Եվրամիության դիտորդական առաքելության անվան տակ Հայաստանի տարածքում ստեղծվում է ՆԱՏՕ-ի ռազմական ենթակառուցվածք։
«Ադրբեջանը կատարել է մի շատ կարևոր այնպիսի բան, որն անհնարին էր թվում, այն է` տարածքային հարցը լուծել է ռազմական ճանապարհով։ Լեռնային Ղարաբաղի խնդիրը շարունակվել է ամբողջ հետխորհրդային ժամանակաշրջանում, բայց Ալիևը որոշեց և կոտրեց այդ իրավիճակը։ Նա ռազմական ճանապարհով ջախջախեց Լեռնային Ղարաբաղի բանակը, որին աջակցում էր Հայաստանը, և գրավեց այդ տարածքը»,- պարզաբանել է Սվետովը։
Փորձագետի կարծիքով, Լեռնային Ղարաբաղի վերադարձն Ադրբեջանին անհարմար նախադեպ է ստեղծել Արևմուտքի համար, քանի որ դա կարող են օգտագործել այլ երկրները իրենց տարածքային վեճերը և աշխարհաքաղաքական խնդիրները լուծելու համար։ «Այդ օրինակը մնացել է արևմտյան աշխարհի կոկորդում, միայն իրենք իրենց կարող են թույլ տալ նման բաներ, և հանկարծ մեկ այլ երկիր է դա անում։ Դա նախադեպ է ստեղծում շատ այլ պետությունների համար: Ինչո՞ւ Սերբիան չպետք է նույն ռազմական միջոցներով ազատագրի Կոսովոն։ Ինչու՞ մենք հատուկ ռազմական գործողության միջոցով չենք կարող իրականացնել դա: Ուստի հիմա Արևմուտքն ու ՆԱՏՕ-ն բոլոր կողմերից ճնշում են գործադրում Ադրբեջանի վրա»,- ամփոփել է Սվետովը։
Ավելի վաղ Հայաստանի Անվտանգության խորհրդի քարտուղար Արմեն Գրիգորյանը հայտարարել էր, որ Ռուսաստանը «վերցրեց» Լեռնային Ղարաբաղը «Երևանի ձեռքից և վերադարձրեց Ադրբեջանին»։ Պաշտոնյայի խոսքով «առանց Մոսկվայի թույլտվության» իբր զինված հակամարտություն չէր լինի Ադրբեջանի և Հայաստանի միջև։
Նյութը հրապարակման պատրաստեց Կամո Խաչիկյանը
