«Թուլացված բանակ». Փաշինյանը հակառակորդի էքսպանսիայի ակնկալիքով նսեմացնում է իր զինվորականներին
ՔԱՂԱՔԱԿԱՆՈՒԹՅՈՒՆ
«Աշխարհի խաչմերուկ» նախագծի իրականացումն անհնար է մի տարածաշրջանում, որտեղ բոլոր խնդիրները լուծվում են ուժի կիրառմամբ, կարծում է հայ ռազմական փորձագետ Հայկ Նահապետյանը, գրում է eadaily.com-ը։ «Մեր տարածաշրջանում անվտանգության սպառնալիքները միայն աճում են: Ռազմական գործողությունների վտանգն արդեն «թակում է Իրանի դուռը», և հաջորդը Հայաստանն է։ «Աշխարհի խաչմերուկը» անհնար է մի տարածաշրջանում, որտեղ ազդեցության գոտիների բաշխումն իրականացվում է ռազմական գործողությունների միջոցով»,- «Օրագիր» հաղորդաշարի եթերում ասել է փորձագետը։
Նահապետյանը կոչ է արել ուշադրություն դարձնել Սիրիայում տիրող իրավիճակին նշելով, որ այդ երկիրը, որպես պետություն, փաստացի դադարել է գոյություն ունենալ։ Սիրիայի տարածքի 60 %-ը, ինչպես ասել է Իսրայելի վարչապետը, գտնվում է Իսրայելի ազդեցության գոտում, որոշակի տարածքներ օկուպացված են, ոչնչացված են հակաօդային պաշտպանության համակարգերը։ Միևնույն ժամանակ, ռազմական գործողություններն արդեն իսկ տեղափոխվել են Իրաքի տարածք: «Ըստ էության, տեղի է ունենում հետևյալը: Թուրքիան և Իսրայելը, ԱՄՆ-ի հովանավորությամբ, ձգտում են ոչնչացնել այն, ինչը երկար տարիներ համարվում էր Իրանի անվտանգության գոտի՝ Լիբանանը, Սիրիան, Իրանը և շուտով Օմանը: Տարածաշրջանը թևակոխել է պատերազմական շրջան: Թուրքական աշխարհը և Իսրայելը պատրաստվում են Իրանի դեմ ուղղակի ռազմական գործողությունների։ Այս սցենարը ոչ միայն իրական է, այլ նաև այն արդեն իսկ իրագործման փուլում է։ Ավելին, Իրանն ամեն ինչ անում է, որպեսզի իր տարածքում ռազմական բախում տեղի չունենա»,- ասել է նա։ Փորձագետը վստահ է, որ Հայաստանի ներկայիս իշխանություններն առաջարկել են ԱՄՆ-ին և ՆԱՏՕ-ին Իրանի դեմ ռազմական գործողությունների ժամանակ երկիրը դարձնել Արևմուտքի դաշնակիցը։
Իր հերթին, ԱԺ ընդդիմադիր «Պատիվ ունեմ» խմբակցության քարտուղար Տիգրան Աբրահամյանը գրել է, որ վերջին մեկ տարվա ընթացքում Ռուսաստանում տասնյակ բարձրաստիճան զինվորականներ, ներառյալ փոխնախարարներ և գերատեսչությունների ղեկավարներ, հեռացվել են իրենց զբաղեցրած պաշտոններից, իսկ շատերի նկատմամբ քրեական գործեր են հարուցվել (հիմնականում կոռուպցիոն բնույթի հանցագործությունների հոդվածներով), մեծ թվով զինվորականներ են ձերբակալվել։ Սակայն այդ ընթացքում ոչ ՌԴ նախագահը, ոչ էլ քաղաքական վերնախավի այլ ներկայացուցիչներ չեն տարածել արձանագրված դեպքերը բոլոր զինվորականների վրա և դրա հիման վրա չեն թիրախավորել, վարկաբեկել կամ արհամարհել բանակն ամբողջությամբ։ Ավելին, երբևէ որևէ մեկի մտքով չի անցել բանակը հայտարարել երկրորդական կառույց և հիշեցնել, որ իրենք պարտք են հարկատուներին, հերոսը հարկատուն է, այլ ոչ թե այն մարդիկ, ովքեր որպես մասնագիտություն ընտրել են հայրենիքի պաշտպանությունը: «Ի՞նչ ունենք Հայաստանում: Աշխարհում չկա երկրորդ երկիր՝ հաշվի առնելով աշխարհագրական դիրքը, հարևանների անառողջ հավակնությունները և անվտանգության մշտական սպառնալիքները, որտեղ երկրի ղեկավարությունը ստանձնած անձը գաղափարական, քաղաքական և քարոզչական առումով նման հարված հասցնի սեփական բանակին: Այս իշխանությունը փորձում է մեր երկիրը վերածել «բացառիկ» իրադարձություններով երկրի, բայց ոչ թե երկրի հեղինակության բարձրացման, հանրային համերաշխության, սահմանների անձեռնմխելիության և անվտանգության ապահովման, այլ պարտությունների, կորուստների, բարոյական անկման և մնացած բոլոր բաղադրիչների շղթայով»,- գրել է պատգամավորը։
Մինչդեռ Նիկոլայ Բորդյուժան, ով 2003-2016 թվականներին աշխատել է ՀԱՊԿ գլխավոր քարտուղարի պաշտոնում, կարծում է, որ Հայաստանի անդամակցության կասեցումը ՀԱՊԿ-ին մեծ սխալ է։ Երևանը միշտ մեծ օգնություն է ստացել Մոսկվայից և կազմակերպության անդամներից: «Իրենք են որոշում, թե ինչպիսի անվտանգության համակարգ է լինելու Հայաստանում. դա իրենց իրավունքն է։ Բայց կարծում եմ, որ դա ահռելի սխալ է հիմնված առաջին հերթին բոլորովին ոչ հավաստի տվյալների վրա։ Եվ երբ Հայաստանի բարձրագույն քաղաքական ղեկավարությունն ասում է, որ իրենք ոչ մի օգնություն չեն ստացել Ռուսաստանից, որ գրեթե Ռուսաստանն է նախապատրաստել այս բոլոր հեղաշրջումները, որ ՀԱՊԿ-ից օգնություն չի եղել, դա բացարձակապես ճիշտ չէ»,- ասել է նա։
ՀԱՊԿ նախկին գլխավոր քարտուղարը նաև նշել է, որ իր աչքի առաջ հակառակն է տեղի ունեցել: «Եվ՛ Հայաստանի զինված ուժերը, և՛ ողջ Հայաստանի ուժային կառույցները ստացել են վիթխարի կազմակերպչական, գիտական և տեխնիկական օգնություն Ռուսաստանի Դաշնությունից: Պարզ է, որ դա ուղղակի փակ տվյալներ են, բայց եթե հաշվեք, թե Ռուսաստանը որքան ներդրումներ է կատարել Հայաստանի զինված ուժերում և ընդհանրապես Հայաստանում, ապա կարծում եմ, որ դա շատ, շատ լուրջ գումար կլինի»,- եզրափակել է Բորդյուժան։
Նյութը հրապարակման պատրաստեց Կամո Խաչիկյանը
