Ռուսաստանը մեծացնում է մինչև 4000 կիլոմետր հեռահարությամբ RS-26 «Ռուբեժ» հրթիռների արտադրությունը
ՄԻՋԱԶԳԱՅԻՆ
Ռուսաստանն ի վիճակի է տարեկան արտադրել մինչև 25 միավոր RS-26 «Ռուբեժ» միջին հեռահարության բալիստիկ հրթիռ, ներառյալ նրա «Օրեշնիկ» կոչվող մոդիֆիկացիան։ Army Recognition-ի հրապարակած այս տեղեկատվությունը հաստատում է Ռուսաստանի ռազմավարական հրթիռային ուժերի հզորության աճը, գրում է overclockers.ru-ն։
RS-26 «Ռուբեժ»-ը համարվում է ժամանակակից ռուսական հրթիռային ծրագրի առանցքային զարգացումներից մեկը։ Այդ բալիստիկ հրթիռը կարող է համալրվել ինչպես միջուկային, այնպես էլ սովորական մարտագլխիկով, ինչն այն դարձնում է ունիվերսալ զենք ռազմավարական նպատակներին հասնելու համար։ Հրթիռի թռիչքի հեռահարությունը 3500-ից 4000 կիլոմետր է, ինչը թույլ է տալիս խոցել Եվրոպայի, Մերձավոր Արևելքի և նույնիսկ Ասիայի որոշ շրջանների թիրախները։
Փորձագետները նշում են, որ RS-26-ի արտադրության ավելացումը լուրջ մարտահրավերներ է ստեղծում ՆԱՏՕ-ի երկրների համար։ Դաշինքը ստիպված է արագացնել հակահրթիռային պաշտպանության համակարգերի արդիականացումը հնարավոր սպառնալիքներին արդյունավետ դիմակայելու համար։ Հատկապես մտահոգված են Արևելյան Եվրոպայի երկրները, որոնց տարածքները գտնվում են այդ հրթիռներով խոցման շառավիղում։
RS-26 «Ռուբեժ»-ի զգալի ներուժը դարձնում է այն Ռուսաստանի ռազմավարության կարևոր տարր՝ անվտանգության ապահովման և ռազմական հզորության ցուցադրման համար: Տարբեր տեսակի մարտագլխիկներով հագեցվելու հնարավորությունը թույլ է տալիս այդ հրթիռներին օգտագործել առաքելությունների լայն շրջանակում, ներառյալ հնարավոր սպառնալիքները կանխելու և օպերատիվ հարվածներ հասցնելու համար:
Համաշխարհային հանրությունը տագնապով է հետևում ռուսական հրթիռների արտադրության աճին գնահատելով դրանց ազդեցությունը համաշխարհային անվտանգության վրա։ Իր հերթին Ռուսաստանն ընդգծում է, որ իր հրթիռային տեխնոլոգիաների զարգացումն ուղղված է բացառապես ազգային շահերի պաշտպանությանն ու ռազմավարական հավասարակշռության պահպանմանը։
Նյութը հրապարակման պատրաստեց Կամո Խաչիկյանը
