Փաշինյանը պայքարում է Անկախության հռչակագրի դեմ
ՔԱՂԱՔԱԿԱՆՈՒԹՅՈՒՆ
Հայաստանի վարչապետ Նիկոլ Փաշինյանը շարունակում է փորձել իր համաքաղաքացիներին ապացուցել, որ Ադրբեջանի և Թուրքիայի դեմ պայքարելու գաղափարը պետության հիմքում դնելը վատ գաղափար է։ Նրա խոսքով, դրա պատճառով Երևանն արդեն իսկ բախվել է լուրջ դժվարությունների, և ապագայում երկիրը կարող է ընդհանրապես վերանալ, գրում է ng.ru-ն։
Հանրային հեռուստաալիքին տված հարցազրույցում Փաշինյանն ասել է, որ ըստ Անկախության հռչակագրի Հայաստանը գոյություն ունենալ չի կարող։ «Պատկերացրեք, մենք նոր անկախ պետություն ենք ստեղծում և հակամարտության տրամաբանություն ենք հաստատում Ադրբեջանի և Թուրքիայի հետ։ Այս միջավայրում ունենալով նման հարաբերություններ, ինչպե՞ս պետք է գոյատևենք։ Դրա համար սուպեր հովանավոր է պետք, այլ ելք չկա»,- ասել է Փաշինյանը։ Միաժամանակ Փաշինյանը հրաժարվել է Սահմանադրության փոփոխության հանրաքվե անցկացնել։ «Եկեք այս հարցերն իրար հետ չկապենք, քանի որ մեր Սահմանադրական դատարանն արդեն ասել է, որ մեր Անկախության հռչակագիրը դե յուրե իրավական ուժ ունի միայն այն մասերով, որոնք բառացիորեն արտահայտված են Սահմանադրության մեջ»,- ընդգծել է վարչապետը։
Հիշեցնենք, որ 1990 թվականի օգոստոսին ընդունված փաստաթուղթը հռչակում է Հայկական պետության անկախությունը հիմնվելով, ի թիվս այլ բաների, Հայկական ԽՍՀ Գերագույն խորհրդի և Լեռնային Ղարաբաղի Ազգային խորհրդի 1989 թվականի դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» համատեղ որոշման վրա: Այն նաև ասում է, որ Հայաստանը հանդես է գալիս «1915 թվականին Օսմանյան Թուրքիայում և Արևմտյան Հայաստանում հայերի ցեղասպանության միջազգային ճանաչման օգտին»։
«Հիմա մեզ շատ է անհանգստացնում այն փաստը, որ ինչ-որ տեղ որոշ մարդիկ օգտագործում են «Արևմտյան Ադրբեջան» տերմինը, չէ՞: Իսկ երբ ասում ենք «Արևմտյան Հայաստան», չե՞նք մտածում այն մասին, որ դա ևս նյարդայնացնում է ոմանց։ Հիմա նորից կասեն, որ սա հերթական դավաճանությունն է, բայց ես այսօր այնպիսի կարգավիճակում եմ, որ պարտավոր եմ խոսել ժողովրդի հետ և ցույց տալ պատճառահետևանքային հարաբերությունները, շղթաները։ Եթե ես դա չանեմ, ապա միտումնավոր մեր երկիրը տանելու եմ պետականության կորստի: Ես դա թույլ չեմ տա»,- պնդել է Փաշինյանը։
Ընդդիմության արձագանքը չի ուշացել: Ինչպես նշել է «Հայաստան» դաշինքի պատգամավոր Լիլիթ Գալստյանը, Արևմտյան Հայաստանն Արևմտյան Ադրբեջանի հետ համեմատելը նշանակում է քաղաքական ինքնասպանություն: Իր հերթին ԱԺ «Պատիվ ունեմ» խմբակցության քարտուղար Տիգրան Աբրահամյանը նշել է. «Խնդիրը ոչ թե Անկախության հռչակագրի մեջ է, այլ Հայաստանի դեմ 44-օրյա պատերազմից ստացած առավելությունը զարգացնելու և օգտագործելու Ադրբեջանի ռազմավարության մեջ»:
Ադրբեջանի քաղաքական հետազոտությունների «Ատլաս» կենտրոնի ղեկավար Էլխան Շահինօղլուն, ընդհակառակը, կարծում է, որ մինչև տարեվերջ Երևանի և Բաքվի միջև խաղաղության համաձայնագրի կնքման միակ ճանապարհը Անկախության հռչակագրի հիշատակումը բացառելն է Հայաստանի Սահմանադրությունից։ «Պարզ է, որ սահմանադրական փոփոխությունների հանրաքվե անցկացնելու ժամանակ չկա։ Ըստ ամենայնի, այն հետաձգվեց մինչև հաջորդ խորհրդարանական ընտրություններ։ Այնուամենայնիվ, պետք է ինչ-որ միջոց գտնել խնդիրն արագ լուծելու համար: Փաշինյանի այն պնդումը, թե Սահմանադրությունը միայն մասամբ է վերաբերում Հռչակագրին, չի դիմանում քննադատությանը: Բաքուն այդ հարցում հետքայլ չի անելու: Ավելին, Սահմանադրության այդ հղումը միակ խոչընդոտն է խաղաղության համաձայնագրի ստորագրման համար»,- ասել է փորձագետը։
Քաղաքական վերլուծաբան Տիգրան Քոչարյանը համաձայն է, որ Փաշինյանը փորձում է կատարել Ադրբեջանի պահանջը, բայց դեռ չի կարողանում դա անել։ «Նախկինում նա փաստացի հայտարարեց փոխադարձության սկզբունքով Երևանի համաձայնության մասին Բաքվի դեմ միջազգային ատյաններում հայցերը հետ կանչելու հարցում։ Նա պատրաստ է նաև սահմանից դուրս բերել օտարերկրյա դիտորդներին։ Բացի այդ, նախապատրաստվում է օրինագիծ բանակում զինվորական ծառայության ժամկետը կրճատելու վերաբերյալ, ինչը կարող է վկայել Հայաստանի ապառազմականացման մասին։ Ստացվում է, որ մնում է միայն Անկախության հռչակագիրը»,- ասել է փորձագետը։
Նյութը հրապարակման պատրաստեց Կամո Խաչիկյանը
