Նրան միշտ կհիշեն որպես համեստ ու պարզ մի երիտասարդի

Այսօր ապրիլյան պատերազմում զոհված տանկիստ Դավիթ Հայրապետյանի ծննդյան օրն է:

Նրա մանկության ընկերը՝ Արման Ասլանյանը, ում հետ մեծացել են, սովորել նույն դպրոցում, ընկերոջը բնութագրում է որպես շատ համեստ, պարզ ու ամաչկոտ մի երիտասարդի, ով միմիայն լավ հիշողություններ է թողել:

«Շատ մտերիմ ընկերներ ենք եղել: Հենց այդպես ժպտերես ու պարզ էլ նրան կհիշեմ»,- «Արմենպրես»-ի հետ զրույցում պատմում է Արմանը:

Դավիթը ծառայությունը սկսել էր Արմավիրի տանկային զորամասում, վեցամսյա զորավարժանքներն անցնելուց հետո տեղափոխվել էր Մարտակերտ:

«Երբեւէ որեւէ դժգոհություն ցույց չի տվել: Ծառայության ժամանակ միշտ կապի մեջ ենք եղել, զանգում, ասում էր, որ ամեն ինչ լավ է, որեւէ խնդիր չունի»:

Դավթի ուսուցչուհին՝ Լուսինե Մխիթարյանը դասավանդել է նրան դեռեւս 7-րդ դասարանից: Տիկին Լուսինեն պատմում է, որ  Դավիթը, ինչպես նաեւ դասարանի մյուս տղաները մեծ ոգեւորությամբ էին պատրաստվում զինվորական ծառայությանը:

«Իմ դասարանում 31 աշակերտ կային, որոնցից 21-ը տղաներ էին: Դե, պատկերացրեք, արդեն իսկ պատրաստի ջոկատ էր: Նրանցից միայն պատրաստակամություն եմ տեսել: Իսկ Դավիթն իսկական ընտանիքի երեխա էր, որդիներից կրտսերը:  Նա աչքի էր ընկնում իր բացառիկ համեստությամբ, շատ ընկերասեր եւ նվիրված էր: Նա իմ հիշողություններում հենց այսպիսին էլ կմնա. տղա, ով չէր սիրում նայել դիմացինի աչքերի մեջ»:  

Ուսուցչուհին հիշում է՝ Դավթի ծնողները դեպքից մի որոշ ժամանակ առաջ էին վերադարձել Հայաստան: Մայրը տիկին Լուսինեին ասել էր, որ անհանգիստ է, վերադարձել են որդուն այցելելու համար:

«Դեպքից մի քանի օր առաջ՝ կարծեմ, մարտի  26-ն էր, հանդիպեցի ծնողներին, հենց այդ ժամանակ Դավիթը զանգահարեց, զրուցեցինք:  Ծնողները մյուս երկու որդու հետ Ռուսաստանում էին: Մայրն ինձ ասաց, որ վերջին ժամանակահատվածում մտքում անընդմեջ Դավիթն է եղել, անհանգիստ էր, ուզում էր անպայման տեսնել նրան: Դե, մենք էլ պարբերաբար հետեւում էինք լրատվությանը, որովհետեւ, բացի Դավթից, ծառայող այլ ծանոթներ էլ ունեինք թե հարազատների, թե աշակերտների շրջանում: Առաջին երկու օրը գիտեինք, որ որեւէ տեղեկություն չկա նրանից,  իսկ արդեն ամսի 5-6-ին իմացանք ամեն ինչ »:   

Դավիթ Հայրապետյանը ծնվել է 1997 թվականի մայիսի 18-ին Գեղարքունիքի մարզի Մարտունու տարածաշրջանի Զոլաքար գյուղում:

Սյուզի Մուրադյան