Բժիշկը նշել է ճշգրիտ տարիքը, երբ պետք է դադարեցնել գարեջուր օգտագործելը և ահա թե ինչու
ՄԻՋԱԶԳԱՅԻՆ
Որոշ մարդիկ կարծում են, որ գարեջուրը և որոշ այլ ալկոհոլային խմիչքներ ունեն օգտակար հատկություններ նյարդային բջիջների համար, սակայն գիտությունն այլ բան է ասում։ Փրփուրային այդ ըմպելիքի օգտագործումը կարող է մեծացնել ծերության ժամանակ Ալցհեյմերի հիվանդության զարգացման ռիսկը, գրում է sports.kz-ն:
Ամերիկացի նյարդաբան բժիշկ Ռիչարդ Ռեստակի խոսքով 65 տարեկանից բարձր մարդիկ պետք է ամբողջությամբ հրաժարվեն ալկոհոլից։ «Ալկոհոլը շատ թույլ նեյրոտոքսին է և այն լավ չէ նյարդային բջիջների համար», - գրել է դոկտոր Ռեստակն իր «Հիշողության ամբողջական ուղեցույց. ձեր միտքն ուժեղացնելու գիտություն» գրքում:
Նյարդաբանը նշել է, որ մարդկանց համար կարևոր է ալկոհոլից զերծ մնալ կյանքի այն փուլում, երբ կարևոր է նեյրոնների պահպանումը։ Նա ընդգծել է, որ 65 տարեկանում դեմենցիայի զարգացման վտանգը հինգ անգամ ավելանում է, և այդ ցուցանիշը շարունակում է աճել յուրաքանչյուր հինգ տարին մեկ։
Բրիտանական Alzheimer's Society բարեգործական կազմակերպության հետազոտությունը ցույց է տվել, որ չափից շատ ալկոհոլ օգտագործելը մեծացնում է դեմենցիայի զարգացման ռիսկը: Գիտնականներն ասում են, որ մարդիկ, ովքեր հիմա գարեջուր չեն խմում, ապագայում էլ չպետք է դա անեն:
Միլան-Բիկոկկա համալսարանի գիտնականներն էլ պարզել են, որ գայլուկային գարեջուրը կարող է նվազեցնել դեմենցիայի զարգացման ռիսկը, բայց միայն չափավոր օգտագործման դեպքում: Նրանք փորձարկել են գարեջրի մեջ հայտնաբերված գայլուկի չորս ընդհանուր տեսակներ՝ տեսնելու, թե որքանով են դրանք կանխում ուղեղում սպիտակուցների կուտակումը, որը կարող է հանգեցնել Ալցհեյմերի հիվանդության: Թեստերի ընթացքում գիտնականները կարողացել են արգելափակել բետա-ամիլոիդ սպիտակուցների կուտակումը բջիջների շուրջ: Այնուամենայնիվ, հետազոտողները խորհուրդ չեն տալիս մեծ տարիքում գարեջուր և այլ ալկոհոլ օգտագործել: Նրանք զգուշացրել են, որ նման խմիչքները կարող են բացասաբար ազդել առողջության վրա։
Նյութը հրապարակման պատրաստեց Կամո Խաչիկյանը
