Սանդուի հետքերով. Հայաստանը կարող է կրկնել մոլդովական ընտրական հնարքը
ՔԱՂԱՔԱԿԱՆՈՒԹՅՈՒՆ
Նախկին ԽՍՀՄ որոշ երկրներ, հետևելով Մոլդովային, կարող են կրկնել այն ընտրական պրակտիկան, երբ որոշիչ են դառնում արևմտյան սփյուռքի ձայները։ Այս մասին «Կոմսոմոլսկայա պրավդա» ռադիոյի եթերում հայտարարել է քաղաքագետ Սերգեյ Ստանկևիչը, գրում է life.ru–ն։ Նա հիշեցրել է, որ ներկայումս միլիոնավոր ուկրաինացիներ են ապրում Ուկրաինայի սահմաններից դուրս, որոնց ձայների վրա էլ կարող է հույս դնել Վլադիմիր Զելենսկին։ Միխայիլ Սահակաշվիլին ևս կարող էր գնալ Մայա Սանդուի հետքերով, ով հաղթեց դրսի աջակցության շնորհիվ, եթե մնար Վրաստանում իշխանության ղեկին։ Քաղաքագետն ուշադրություն է հրավիրել նաև Արևմուտքում առկա հսկայական հայկական սփյուռքի վրա:
«Նույն սպառնալիքը կարող է առաջանալ, օրինակ, Հայաստանում։ Հուսով եմ, որ դա չի առաջանա, բայց կա նաև մի հսկայական սփյուռք, որն ապրում է Արևմուտքում, որին նույն կերպ օգտագործելու դեպքում կարելի է նաև լուծել իշխանության հարցը»,- նկատել է փորձագետը։
Հիշեցնենք, որ Մոլդովայում նախագահական ընտրությունների երկրորդ փուլի արդյունքներով երկրի գործող ղեկավար Մայա Սանդուն հաղթել է ձայների 55,33 %-ով։ Նախկին գլխավոր դատախազ Ալեքսանդր Ստոյանոգլոն ստացել է 44,67 %, սակայն երկրի ներսում նրան աջակցել է ընտրողների 51,19 %-ը ի տարբերություն Սանդուի (48,81 %)։ Մոլդովայի սոցիալիստների կուսակցությունը հրաժարվել է ճանաչել ընտրությունների արդյունքները։
Նյութը հրապարակման պատրաստեց Կամո Խաչիկյանը
