ԴԱՀԿ ունեցողը չի կարող օգտվել Telcell հավելվածից, տերմինալն էլ գումարը վերցնում, կտրոն չի տալիս
ՀԱՍԱՐԱԿՈՒԹՅՈՒՆԵրևանում հանրային տրանսպորտից օգտվողները ստիպված են այսօրվանից վճարում կատարել կա՛մ Telcell-ի օնլայն հավելվածով, կա՛մ Telcell-ի տերմինալով ձեռք բերված կտրոնի միջոցով, կա՛մ էլ 100 դրամանոց մետաղադրամով։
Վաղ առավոտից մայրաքաղաքում տրանսպորտային կոլապս է առաջացել։
Քաղաքային իշխանության կայացրած այս որոշումը դժգոհությունների պատճառ է դարձել։ Բազմաթիվ քաղաքացիներ սմարթֆոններ չունեն և չեն կարող օնլայն հավելվածի միջոցով վճարում կատարել, 100 դրամ գտնելը ևս դժվարացել է, կարելի է ասել՝ անհնար է դարձել։
Մնում է վերջին՝ 3-րդ տարբերակը, որ քաղաքացին Telcell տերմինալով վճարի և կտրոն ձեռք բերի, բայց այստեղ ևս խնդիրներ կան։
Oragir.News-ը բազմաթիվ ահազանգեր է ստանում, որ ավտոբուսներում տեղադրված սարքերը՝ վալիդատորները, որոնցով պետք է օնլայն վճարում կատարել, թերի են աշխատում, մի քանի փորձից հետո են միայն QR կոդը կարդում և վճարումը հաստատում, երբեմն էլ ընդհանրապես չի ստացվում։
Խնդիրներից մեկն էլ այն է, որ քաղաքացին, որն ունի ԴԱՀԿ, չի կարող Telcell օնլայն հավելված ներբեռնել հեռախոսում և վճարում կատարել, քանի որ յուրաքանչյուր լիցքավորված գումարը ԴԱՀԿ-ն ավտոմատ գանձում է։
Ինչ վերաբերում է տերմինալով վճարելուն և կտրոն ձեռք բերելուն, ապա այստեղ ևս խնդիրներ են առաջանում։ Telcell տերմինալով վճարում կատարելիս ծրագիրն առաջարկում է հեռախոսահամար նշել, բայց կա նաև հնարավորություն բաց թողնել այն և միանգամից լիցքավորում կատարել ու կտրոնը վերցնել։ Խնդիրն այստեղ կայանում է նրանում, որ հեռախոսահամարի դաշտում քաղաքացին կարող է ցանկացած մեկի հեռախոսահամարը նշել, եթե չի ուզում նույնականացվել։ Բայց լինում են դեպքեր, որ տերմինալը կտրոն չի տրամադրում, և քաղաքացին, որ վերջին կոպեկն ուներ տրանսպորտից օգտվելու համար, մնում է «բորտին»։
Oragir.News-ն այսօր փորձեց Արշակունյաց պողոտայի սկզբնամասում տեղադրված Telcell վճարային տերմինալով ձեռք բերել ավտոբուսի 2 ուղետոմս, հեռախոսահամարի վանդակը բաց թողեցինք, անցանք հաջորդ քայլին՝ լիցքավորում և առաջ։ Տերմինալը հաստատեց մուտքագրված գումարը, բայց կտրոն չտրամադրեց։ Եվս մեկ անգամ փորձեցինք, այս անգամ արդեն 100 դրամ լիցքավորեցինք, բայց կտրոն այդպես էլ չտրամադրեց։
Փաստացի՝ քաղաքային իշխանությունը մի որոշում է կայացրել, որի հետևանքով հազարավոր քաղաքացիներ տուժում են։ Գուցե Տիգրան Ավինյանն ու ՔՊ-ական վերնախավը որոշ ժամանակ երթևեկեն գերբեռնված տրանսպորտով, 100 դրամանոց մետաղադրամներ փորձեն գտնել, օնլայն հավելվածի խափանումներին ականատես լինեն, որ զգան իրենց կայացրած որոշումների «հաճույքը»։
