Տարեցների և հաշմանդամների սպասարկման կազմակերպություններում մեկ տարում 160 մարդ է մահացել
ՀԱՍԱՐԱԿՈՒԹՅՈՒՆ
Այսօր աշխարհում նշվում է ընտանիքի օրը: Panorama.am-ը Ազգային վիճակագրական ծառայության կայքէջից առանձնացրել է այն տվյալները, որոնք վերաբերում են ընտանիքին:
Այսպես.
Այս տարվա առաջին երեք ամիսներին գրանցված ամուսնության դեպքերը 2016թ. հունվար-մարտի համեմատ նվազել են 7.4%-ով, իսկ ամուսնալուծության դեպքերն աճել են` 14.2 %-ով:
Հայաստանում 2017թ. հունվար-մարտին գրանցված 1 000 ամուսնությունների համեմատ արձանագրվել է ամուսնալուծության 274 դեպք` 2016թ. հունվար-մարտին արձանագրված 222 դեպքի համեմատ:
Այս տարվա առաջին երեք ամիսներին գրանցված կենդանի ծնունդները 2016թ. նույն ժամանակա-շրջանի համեմատ նվազել են 6.5%-ով, իսկ մահվան դեպքերն ավելացել են՝ 3.8 %-ով:
2017թ. հունվար-մարտին կենսունակության գործակիցը՝ ծնվածների և մահացածների հարաբերակցու- թյունը, կազմել է 106.2%, նախորդ տարվա նույն ժամանակաշրջանում արձանագրված 117.8% համեմատ:
Հայաստանի մշտական բնակչության թվաքանակը 2017թ. ապրիլի 1-ի դրությամբ 2016թ. նույն ժամանակաշրջանի համեմատ նվազել է 12.9 հազ. մարդով կամ 0.4%-ով:
2017թ. հունվար-մարտին, ինչպես և 2016թ. հունվար-մարտին, արձանագրվել է 0-1 տարեկան երեխաների մահվան 74 դեպք:
Հայաստանում գործող 8 մանկատներում 2016-ին սկզբին եղել է 864 երեխա, նրանցից 407-ը աղջիկներ են եղել: Տարեվերջին մանկատանը եղել է 810 երեխա: Տարվա ընթացքում հարազատների մոտ վերադարձել է 38 երեխա, որդեգրվել 48-ը, մահացել է 17-ը:
Հայաստանում գործող տարեցների և հաշմանդամների սոցիալական սպասարկման 9 կազմակերպություններում 2016-ի սկզբին եղել է 1 320 խնամյալ, որից 711-ը կանայք են: Տարեվերջին խնամյալների թիվն աճել է ՝ հասնելով 1 370-ի:
Նրանցից 460-ը 71 և ավելի բարձր տարիքի են: Մեկ տարվա ընթացքում հարազատների մոտ վերադարձել է 81 տարեց, կազմակերպություններում մահացել են 160-ը:
Կազմակերպություններում գտնվող տարեցներից 251-ը անկողնային հիվանդ են, 867-ը հաշմանդամություն ունեն, 229-ը զավակ ունեն: Զավակ ունեցողներից 101-ը կանայք են:
