Եվրամիություն մտնելու Հայաստանի ցանկությունը կատակի է նման
ՔԱՂԱՔԱԿԱՆՈՒԹՅՈՒՆ
Հայաստանի ընդգրկումը եվրոպական երկրների շարք և ԵՄ-ին անդամակցելու ցանկությունը կատակի է նման, ասել է ՌԴ Պետդումայի պաշտպանության հանձնաժողովի նախագահի առաջին տեղակալ Ալեքսեյ Ժուրավլևը։ News.ru-ի հետ զրույցում խորհրդարանականը հիշեցրել է, որ Թուրքիան, որի առնվազն մի մասը փաստացի գտնվում է Եվրոպայում, ավելի քան կես դար է սպասում է ԵՄ-ին անդամակցելուն։ «Եթե անգամ Ուկրաինայի մասին հայտնի նեոնացիստական հայտարարություններն են հարցեր առաջացնում, ապա Հայաստանին եվրոպական երկրների շարքում ներառելը որպես անեկդոտ է հնչում։ Կարծես թե ոչ ոք չգիտի, թե ինչպես է Թուրքիան, որի տարածքն իրականում գտնվում է Եվրոպայում, ավելի քան կես դար սպասում ԵՄ-ին անդամակցելու համար»,- պարզաբանել է Ժուրավլևը։
Նա նաև նշել է, որ Երևանի «արևմտյան պաշտպանները» ղարաբաղյան վերջին ճգնաժամի ժամանակ պարզապես ստիպել են Հայաստանի վարչապետ Նիկոլ Փաշինյանին այդ տարածաշրջանը վերադարձնել Ադրբեջանին։ Միաժամանակ, պարզաբանել է պատգամավորը, ոչ ոք չգիտի, թե դրա դիմաց ՞ինչ են խոստացել այդ քաղաքական գործչին։ «ՆԱՏՕ-ի ոչ մի զինվոր ոտքի չկանգնեց պաշտպանելու Երևանը, և նաև հիշեցնեմ, որ այդ պահին երկրի իշխանությունները չդիմեցին ՀԱՊԿ-ին։ Պատերազմող կողմերի միջև կային միայն ռուս խաղաղապահներ, որոնք թույլ չտվեցին, որ խաղաղ բնակչության շրջանում մեծ արյունահեղություն տեղի ունենա»,- եզրափակել է Ժուրավլևը։
Հիշեցնենք, որ Փաշինյանն ավելի վաղ ասել էր, որ Հայաստանը բաց չի թողնի Եվրամիությանն անդամակցելու իր շանսը։ Միաժամանակ վարչապետը պարզաբանել էր, որ Հայաստանը նպատակ չունի խզել տնտեսական կապերը Ռուսաստանի և Եվրասիական տնտեսական միության հետ։
Նյութը հրապարակման պատրաստեց Կամո Խաչիկյանը
