«Հայաստանում մտադիր են ստորագրություններ հավաքել ԵՄ-ին անդամակցելու համար. Փաշինյանի փիառը»
ՔԱՂԱՔԱԿԱՆՈՒԹՅՈՒՆ
Հայաստանում սեպտեմբերի 16-ից նոյեմբերի 14-ը ստորագրահավաք է անցկացվելու երկրի Եվրամիությանն անդամակցելու համար։ ԿԸՀ-ն արդեն գրանցել է համապատասխան քաղաքացիական նախաձեռնությունը, որին մասնակցել է 51 անձ։ Կենտրոնական ընտրական հանձնաժողովի նախագահ Վահագն Հովակիմյանն ասել է, որ նախաձեռնող խումբը ներկայացրել է «Հանրաքվեի մասին» օրենքով նախատեսված բոլոր անհրաժեշտ փաստաթղթերը։ Եթե այդ ակտիվիստներին հաջողվի հավաքել անհրաժեշտ թվով ձայներ, ապա նախաձեռնությունը կքննարկվի խորհրդարանում, և օրենսդիր մարմնի պատգամավորները որոշում կկայացնեն այդ հարցով։
Հումանիտար գիտությունների պետական ակադեմիական համալսարանի դոցենտ Արթուր Ավակովը mk.ru-ի հետ զրույցում խոսել է Հայաստանի եվրոպական ինտեգրման ուղու մասին:
«Հայաստանի եվրաինտեգրումը PR է Նիկոլ Փաշինյանի կառավարության համար: Հանրապետությունում Եվրամիությունը բավականին պոպուլյար է, այն ընկալվում է որպես անվտանգության աղբյուր Թուրքիայից և Ադրբեջանից բխող սպառնալիքների համատեքստում։ Եվ այդ թեման արդիական կլինի բավականին երկար ժամանակ։ Միևնույն ժամանակ, Եվրամիությունը գործնականում չի ապահովում նույնիսկ իր անվտանգությունը: Բացի այդ, հայերի մի զգալի մասն իրականում բավականին հեռու է այն ամենից, ինչ սովորաբար կոչվում է «եվրոպական արժեքներ»:
Հասարակությունը դեռ երկար ճանապարհ ունի անցնելու ժողովրդավարության, առողջապահության, կրթության, տարբեր փոքրամասնությունների իրավունքների պաշտպանության և այլնի զարգացման համար: Կասկածներ կան նաև ԵՄ-ի ընդլայնման պատրաստակամության վերաբերյալ։ Դա ընդունում է անգամ ինքը՝ Փաշինյանը: Թվում է, թե Եվրոպան, իրեն սպառնացող ներկայիս սպառնալիքների ֆոնին, աստիճանաբար գնում է դեպի մեկուսացում։ Ինչ վերաբերում է բուն հանրաքվեին, ապա դրա արդյունքը լինելու է բացառապես դեկլարատիվ։ Միաժամանակ, եվրաինտեգրման աջակցության աստիճանը կախված կլինի նրանից, թե ինչպե՞ս կձևակերպվի հարցը։ Օրինակ, եթե հայերին հարցնեն, թե արդյո՞ք նրանք ցանկանում են լինել Երկրային դրախտում, ապա կլինի միայն մեկ պատասխան, բայց եթե դրա համար նաև պահանջվի հրապարակայնորեն ապաշխարել Ղարաբաղի համար և օրինականացնել միասեռ ամուսնությունները, ապա կլինի այլ պատասխան»,- ասել է Ավակովը:
Նյութը հրապարակման պատրաստեց Կամո Խաչիկյանը
