Երեք տարի, երեք ամիս, երեք օր Հայաստանում չեմ եղել. Դելոն Երևանում է
ՖՈՏՈ
Life.panorama.am-ը գրում է
Ամերիկաբնակ դերասան Վահագն Ստեփանյանը երեք տարի անց առաջին անգամ Երեւանում է:
«Երեք տարի, երեք ամիս, երեք օր Հայաստանում չեմ եղել»,- Life.panorama.am-ի հետ զրույցում նշեց Դելոն՝ նկատելով, որ ընտանիքից ու սիրելի երկրից երեք տարի հեռու լինելն իր կյանքի ամենամեծ փորձությունն է համարում, միաժամանակ, հենց այդ երեք տարիների ընթացքում էլ նա ստեղծեց իր երջանիկ ընտանիքը.
«Վերջին տարիներին ես ինձ բացառապես նվիրեցի իմ ընտանիքին: Իսկ վեց ամիս առաջ ծնվեց իմ հրաշք ոդրին, ով փոխեց մեր կյանքն ու մեզ ամենաերջանիկը դարձրեց: Ես ընտանիք սիրող մարդ եմ ու ամեն ինչ արել եմ իմ ընտանիքում առողջ եւ հաճելի մթնոլորտ ստեղծելու համար»,- ընդգծեց մեր զրուցակիցն, ով, ի դեպ, նշեց, որ կնոջ հետ զուգահեռ զբաղվում է որդու խնամքով եւ դա անում է մեծ հաճույքով՝ վայելելով որդու ամեն մի օրը:
Մեզ հետ զրույցում Վահագն Ստեփանյանը պատմեց, որ Երեւան է եկել շատ անակնկալ կերպով՝ հենց իր ծննդյան օրը.
«Մոտ մեկ ամիս առաջ մայրիկիս ծննդյան օրն էր, ու քանի որ մերոնք տղայիս չէին տեսել, որոշեցի կնոջս ու որդուս ուղարկել Հայաստան, որպեսզի վերջապես կայանար սպասված հանդիպումը, իսկ մայիսի 5-ին՝ ծննդյանս օրը, ես եկա ու անակնկալի բերեցի բացառապես բոլորին: Գալուս մասին տեղյակ էր միայն հարազատ եղբայրս: Մեր պայմանավորվածության համաձայն՝ նա այդ օրը մերոնց տարել էր հետաքրքիր մի վայր, որպեսզի առանց ինձ նշեն իմ ծննդյան օրը, այդ ժամանակ Skype-ով զանգեցի նրանց, խոսեցինք, շնորհավորեցին ինձ՝ մտածելով, որ ԱՄՆ-ում եմ, ու վայրկյաններ անց ներս մտա: Չեմ կարող նկարագրել մայրիկիս ուրախությունը, շատ հուզիչ էր ամեն ինչ, այդ րոպեները կյանքումս չեմ մոռանա»,- պատմեց Դելոն, ով այստեղ կլինի մեկ ամիս, այնուհետեւ կվերադառնա ԱՄՆ՝ կրկին գալու նպատակով.
«Սեպտեմբերին որդուս մեկ տարեկանն է, Աստված առաջ՝ նպատակ ունենք այստեղ նշելու: Այնպես որ, հիմա, երբ թղթաբանական հարցերը կարգավորված են, շատ հաճախ կգամ Հայաստան»,- նշեց նա:
Դելոյի խոսքով՝ բացակայության ընթացքում անբացատրելի կարոտել է իր սիրելի Դավթաշենը.
«Երեւանս շատ է փոխվել, նոր ու շատ գեղեցիկ շենքեր են ավելացել, քաղաքն ընդհանուր շատ է սիրունացել, իսկ իմ սիրելի Դավթաշենը, որն ինձ համար ուղղակի դրախտ է, էլ ավելի բարեկարգ է դարձել, ինչի համար շատ ուրախ եմ: Այս օրերին ընտանիքով փորձում ենք շրջել ոչ միայն Երեւանով, այլեւ Հայաստանով մեկ, տարբեր սրբավայրեր ենք գնում: Ուզում ենք հասցնել հնարավորինս շատ վայրեր այցելել: Հայաստանը, այստեղի օդն ու ջուրը աշխարհում ոչ մի բանի հետ չեմ փոխի, հավատացեք՝ ինձ համար այստեղ ավելի հետաքրքիր ժամանցի վայրեր կան, քան Լոս Անջելեսում: Բնականաբար, այստեղ էլ որոշ բաներ չկան, որոնք կան ԱՄՆ-ում, բայց այս պարագայում խոսքն ավելի խոշոր բաների մասին է՝ Դիսնեյլենդ եւ այլն»,- պատմեց դերասանը:
Հետարքքրվելով աշխատանքային ծրագրերից՝ Դելոն նշեց, որ արդեն իսկ սկսել է այդ ուղղությամբ մտածել.
«Ինչպես նշեցի՝ վերջին տարիներին հիմնականում ինձ նվիրել էի ընտանիքիս: ԱՄՆ-ում ուսումնասիրում էի հայկական շոու բիզնեսը, փորձում էի հասկանալ, թե ինչն է ինձ առավել հետաքրքրում ու հիմա, կարծես թե գտել եմ: Նոր գաղափարներ կան, որոնց բանակցությունները կսկսվեն այստեղից, սակայն մանրամասներ դեռեւս չեմ ցանկանա հայտնել»,- հավելեց դերասանը:
