Հարավային Կովկասը Կիևին խոստովանել է իր զգացմունքները
ՄԻՋԱԶԳԱՅԻՆ
Մինչ The Guardian-ը գրում է Ռուսաստանի կենտրոնական մասի վրա հրթիռային հարվածներ հասցնելու Կիևի ծրագրերի մասին, Ադրբեջանի, Հայաստանի և Վրաստանի ղեկավարները շնորհավորել են Ուկրաինային Անկախության օրվա առթիվ, գրում է ng.ru-ն։
Նրանք, մասնավորապես, ընդգծել են, որ ճանաչում են նրա տարածքային ամբողջականությունը, ինչպես նաև երկկողմ հարաբերությունների զարգացման հույս ունեն։ Միաժամանակ, Արևմուտքում Թբիլիսիին մեղադրում են Ռուսաստանի հետ սիրախաղի մեջ, իսկ Երևանն ու Բաքուն նրա հետ դաշնակցային հարաբերությունների մեջ են։ Վրաստանի իշխանություններն ավանդաբար պառակտվել են: Այսպես, Հանրապետության նախագահ Սալոմե Զուրաբիշվիլին «ամբողջ սրտով» շնորհավորել է «սիրելի ուկրաինացիներին», սակայն իշխող «Վրացական երազանք» կուսակցությունը որոշել է անտեսել ուկրաինական տոնը։
«Վրաստանը փորձում է հնարավորինս հեռու մնալ Ուկրաինայից, որպեսզի չհակամարտի Ռուսաստանի հետ։ Իր հերթին, Հայաստանն ու Ադրբեջանն իրենց չափազանց պրագմատիկ են պահում։ Նրանք օգտագործում են Ուկրաինայի հետ հարաբերություններն ամրապնդելու իրենց բազմավեկտոր քաղաքականությունը։ Ավելին, Բաքվի դեպքում Ռուսաստանը դրան ըմբռնումով է վերաբերվում, իսկ Երևանի դեպքում խանդով, քանի որ նա ՀԱՊԿ անդամ է։ Թերևս Վրաստանը ևս կցանկանար նույն կերպ մանևրել, բայց դրա համար ավելի քիչ հնարավորություններ ունի, քանի որ արդեն բավականին հեռուն է գնացել արևմտյան կառույցներին ինտեգրվելու ճանապարհին, և հիմա, ընդհակառակը, ուզում է հետ գլորվել»,- կարծիք է հայտնել քաղաքագետ Ալեքսեյ Մակարկինը։
Իր հերթին ԱՊՀ երկրների ինստիտուտի ղեկավարի տեղակալ Վլադիմիր Ժարիխինը կոչ է արել նման շնորհավորանքներից ողբերգություն չսարքել։
«Ինչպես գիտենք, Ռուսաստանը պատերազմ չի հայտարարել Ուկրաինային, ուղղակի իրականացնում է հատուկ ռազմական գործողություն։ Միաժամանակ Կիևը դիվանագիտական հարաբերություններ է պահպանում տարբեր երկրների, այդ թվում ՀԱՊԿ-ում ընդգրկվածների հետ։ Ի վերջո Ուկրաինան ազգային տոնի առթիվ շնորհավորանքներ է ստացել ոչ միայն կովկասյան հանրապետություններից, այլ նաև Բելառուսի ղեկավար Ալեքսանդր Լուկաշենկոյից՝ Մոսկվայի մերձավոր դաշնակցից։ Նա դա արել է դիվանագիտական ավանդույթի շրջանակներում»,- նշել է Ժարիխինը։
Ըստ նրա այս ամենը ցույց է տալիս իրավիճակի երկակիությունը՝ ռազմական գործողությունները շարունակվում են, բայց պատերազմ չկա։ Եթե ձևն ու բովանդակությունը նույնը լինեին, ապա Ռուսաստանի գործընկերները պետք է ընտրեին, թե որ կողմում են։
«Այժմ նրանք կարող են իրենց թույլ տալ բարեկամ լինել Ռուսաստանի հետ և հարաբերություններ պահպանել Ուկրաինայի հետ»,- ընդգծել է փորձագետը։
Նյութը հրապարակման պատրաստեց Կամո Խաչիկյանը
