«Բարդակ» և անմարդկային վերաբերմունք` «Նաիրի» բժշկական կենտրոնում

Պարզվում է` անգամ գերժամանակակից սարքավորումների քողի տակ գովազդվող և կոսմետիկ վերանորոգումով կուլտուրական հիվանդանոցի շղարշ հագած Նաիրի բժշկական կենտրոնում ամեն ինչն է կոսմետիկ և դեռևս սովետական սպասարկման ծանր ժառանգությունը շարունակում է այս բժշկական կենտրոնում մնալ գերիշխող:

Բառացիորեն այսօր գործընկերներիցս մեկը շատ վատ ինքնազգացողությամբ մի կերպ հասնում է նշյալ բժշկական կենտրոն և խնդրում է հետազոտել և բուժումներ նշանակել: Ընդունարանի աշխատակցուհին հիվանդին ուղարկում է նյարդաբանի մոտ նախնական հետազոտման` հետագա բուժումների և ստուգումների գրաֆիկը կազմելու նպատակով: Գործընկերս գնում է նշյալ բժշկի ընդունարան, օգնականից տեղեկանում է, որ բժիշկը շրջագայում է հիվանդասենյակներով և տեղում կլինի 10 րոպեից:

Շուրջ կես ժամ սպասելուց հետո գործընկերս կրկին դիմում է օգնականին, նշում է, որ ինքը իրեն վատ է զգում և խնդրում է հստակ իմանալ, թե բժիշկը երբ է գալու: Օգնականը ասում է, որ քիչ առաջ բժիշկը զանգահարել և ասել է, որ տեղում կլինի 5 րոպեից: Նշյալ հինգ րոպեից ևս կես ժամ անց բժիշկը չի ժամանում` օգնականի միջոցով անընդհատ հիվանդներին խաբելով և մուտքի մոտ սպասեցնելով:

Եվս մի քանի անգամ խաբելուց հետո վրդովված հիվանդների բողոքին ի պատասխան գործավարուհին մտնում է ինչ որ սենյակ և վերադառնալուց հետո նշում, որ իբր բժիշկը զբաղված է ծանր հիվանդով և շատ ուշ է գալու, կարող եք չսպասել:

Զգալով, որ իրեն անամոթաբար խաբում են` հիվանդը կրկին դիմում է ընդունարան, որտեղից մի կերպ գտնում են իրենց նյարդաբանին, ով. պարզվում է, ոչնչով էլ զբաղված չէր և առաջարկում են ուղեկցել կրկին նրա մոտ` հետազոտման: Անշուշտ, պատմության հերոսը հրաժարվում է հետազոտվել նման ''բարդակի'' պայմաններում և վրդովված հետանում է:

Այստեղ երկու շատ կարևոր հանգամանք կա` առաջինը Հիպոկրատին երդված բժիշկ, ով անտարբեր է գտնվում վատ ինքնազգացողություն ունեցող մարդու նկատմամբ և երկրորդը` ժամանակակից սարքավորումները ինչի և ում են պետք, եթե բժշկական կենտրոնում բարդակ է և հաճախորդը նման արհամարհանքի է արժանանում:

Մեզ մնում է այսուհետ պարբերաբար կոչ անել ուղղակի բոյկոտել նման անպատասխանատու հիմնարկները և հիվանդի նկատմամբ, մեղմ ասած, անմարդկային վերաբերմունք ցուցաբերած հաստատությունները...

Իսկ պատկան մարմիններին կոչ ենք անում հետաքննել նման դեպքերը և պատժել հիվանդին անօգնական թողած բժշկական կենտրոնին...

Անի Մարկոսյան