Ներսիկ եւ Արաբո Իսպիրյանները Տարոն Մարգարյանին հաղթանակ են մաղթում․ Ֆոտոշարք

Hraparak.am-ը գրում է.

Երեկ, Ազատության հրապարակում Ներսիկ, Աղասի եւ Արաբո Իսպիրյանները մայիսի 9-ին՝ Շուշիի ազատագրման օրվան ընդառաջ, հայրենասիրական երգերով մոտ 3 ժամ ելույթ ունեցան։

Համերգը կազմակերպվել էր Երեւանի քաղաքապետարանի հովանավորությամբ, ինչի մասին իր խոսքում հայտնեց Ներսիկ Իսպիրյանը։ Նա նաեւ նշեց, որ մայիսը հաղթանակների ամիս է, եւ Երեւանի քաղաքապետի ընտրություններում գործող քաղաքապետ Տարոն Մարգարյանին հաղթնակ է մաղթում։ Կոչ արեց հավաքվածներին միասին վանկարկել՝ հաղթանակ։

Տարոն Մարգարյանը համերգին հետեւում էր Ազատության հրապարակի մոտակայքում գտնվող «Ատլանտիկ» սրճարանից։

Համերգից հետո Ներսիկ Իսպիրյանը «Հրապարակ»-ի հետ զրույցում ասաց, որ թե՛ Տարոն Մարգարյանի եւ թե՛ մյուս երկու քաղաքապետի թեկնածուների նախընտրական ծրագրերին ծանոթացել է եւ առավել կողմնակից է Տարոն Մարգարյանին․ «Ընդդիմադիրներն էլ են մեր եղբայրները։ Բոլոր դեպքերում ժողովուրդն է ընտրողը, կարծում եմ՝ կկողմոնորշվի»։

Ներսիկ Իսպիրյանի որդին՝ Արաբոն, մեր հարցին՝ Երեւանի ավագանու ընտրություններում ինքը եւս հաղթանակ է մաղթո՞ւմ գործող քաղաքապետին, ասաց․ «Ոնց որ հայրիկս ասում ա այդպես էլ մենք անում ենք։ Ինքը լինելով մշեցու զավակ լավ տպավորություն է թողել իմ մոտ եւ ասեմ, որ Տարոն Մարգարյանը շատ հայրենասեր մարդ է»։

Հարցին՝ ծանո՞թ է մյուս քաղաքապետի թեկնածուներին, նրանց նախընտրական ծրագրերին, Արաբոն ասաց, որ այդ հարցին չի կարող պատասխանել։

Աննա ՊԱՊԻԿՅԱՆ