Գեղարքունիքի մարզում 38-ամյա մոտոցիկլավարը կողաշրջվել է

Երեկ՝ հուլիսի 13-ին, մոտոցիկլի կողաշրջման դեպք է տեղի ունեցել Գեղարքունիքի մարզում։ Ժամը 21:40-ի սահմաններում Կոտայքի մարզի բնակիչ 38-ամյա Արգամ Մ.-ն իր վարած «Benelli» մակնիշի մոտոցիկլով Գագարին բնակավայրից դեպի Գեղամավան բնակավայր տանող ավտոճանապարհին, դեռևս անհայտ հանգամանքներում, կողաշրջվել է։

Ինչպես հայտնում է ֆոտոլրագրող Գագիկ Շամշյանը, կողաշրջման հետևանքով մոտոցիկլավարը մարմնական վնասվածքներով տեղափոխվել է «Սևան» բժշկական կենտրոն։Օպերատիվորեն դեպքի վայր են ժամանել ՀՀ Ներքին գործերի նախարարության Ոստիկանության Պարեկային ծառայության Գեղարքունիքի մարզի գումարտակի 1-ին վաշտի պարեկները՝ գումարտակի հրամանատար Ալբերտ Մարտիրոսյանի, գումարտակի ծառայության տեսուչ Հրաչյա Գևորգյանի գլխավորությամբ։

Ժամանել են նաև ոստիկանության Սևանի բաժնի պետ Սուրիկ Ջանիկյանն ու բաժնի պետի օպերատիվ գծով տեղակալ Կարեն Ավետիսյանը։Դեպքի մասին ոստիկանության Սևանի բաժնից տեղեկությունը փոխանցել են ՀՀ քննչական կոմիտեի Գեղարքունիքի մարզային քննչական վարչության Սևանի քննչական բաժին, որտեղից ժամանել է քննչական խումբը՝ բաժնի պետ Թորգոմ Չանդոյանի և օրվա պատասխանատու հերթապահ քննիչի գլխավորությամբ։

Դեպքի փաստով Սևանի քննչական բաժնում նախաձեռնվել է քրեական վարույթ։