«Սայթաքուն ուղի». Պետդումայում կոչ են արել Փաշինյանին Հայաստանում ռուսաֆոբիա չհրահրել
ՔԱՂԱՔԱԿԱՆՈՒԹՅՈՒՆ
ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Վիկտոր Վոդոլացկին news.ru-ի հետ զրույցում ՀՀ վարչապետ Նիկոլ Փաշինյանին կոչ է արել երկրում ռուսաֆոբիա չհրահրել։ Ըստ խորհրդարանականի դա սայթաքուն ուղի է:
«Այն ամենը, ինչ այսօր անում է Փաշինյանի ղեկավարությունն ու թիմը, վատ ախտանիշ է, սայթաքուն քայլ է խթանել ռուսաֆոբ քաղաքականություն Հայաստանի ներսում։ Դա կարող է բումերանգի կանոնով գործել Փաշինյանի համար»,- պարզաբանել է պատգամավորը։
Ինչպես նշել է Վոդոլացկին, Փաշինյանն ինքն է հրաժարվել Ղարաբաղից։ Այժմ, ըստ խորհրդարանականի, Հայաստանի վարչապետը փորձում է պատասխանատվությունը գցելով Ռուսաստանի Դաշնության վրա սպիտակեցնել իրեն։ Նա նաև ընդգծել է, որ ռուս խաղաղապահներն իրականում փորձել են ամեն ինչ անել, որպեսզի խուսափեն Ղարաբաղի տարածքում խաղաղ բնակիչների սպանությունից։
«Հիմա Փաշինյանը փորձում է սպիտակեցնել իրեն ու մեղադրելով Ռուսաստանին սկսել է իր բոլոր անախորժություններն ու խնդիրները ցավոտ գլխից տեղափոխել առողջ գլխի մեջ։ Ռուս խաղաղապահներն ամեն ինչ արեցին, որպեսզի այնտեղ (Ղարաբաղում) խաղաղ բնակիչների սպանություններ չլինեն և օգնեցին տեղի բնակիչներին։ Դրա ապացույցները կան»,- հավելել է Վոդոլացկին:
Դաշնային խորհրդի փոխխոսնակ Կոնստանտին Կոսաչովն էլ ավելի վաղ հայտարարել էր, որ Ռուսաստանը պատրաստ է բարեկամական հարաբերություններ կառուցել Հայաստանի հետ։ Նա ընդգծել էր, որ «երկու հոգով են տանգո պարում», ուստի վերջնական արդյունքը կախված է Երևանից։ Սենատորը նաև նշել էր, որ Հայաստանի մերձեցումն Արևմուտքի հետ անպատասխանատու քայլ է:
Նյութը հրապարակման պատրաստեց Կամո Խաչիկյանը
