Փաշինյանի քաղաքական արկածախնդրությունները վատ կավարտվեն
ՔԱՂԱՔԱԿԱՆՈՒԹՅՈՒՆ
Հայաստանի վարչապետը կտրուկ արտահայտվել է Բելառուսի նախագահ Ալեքսանդր Լուկաշենկոյի դեմ, նա հայտարարել է, որ ոչ ինքը, ոչ էլ հանրապետության այլ պաշտոնական ներկայացուցիչներ այսուհետ ոտք չեն դնի Բելառուս, քանի դեռ այնտեղ իշխանությունը չի փոխվել։ Փաշինյանը նաև նշել է, որ Երևանը կարող է փոխել իր վերաբերմունքը ՀԱՊԿ-ի նկատմամբ, եթե Լուկաշենկոն ներողություն չխնդրի Հայաստանից, գրում է tsargrad.tv-ն։
Միևնույն ժամանակ, քաղաքական վերլուծաբանների մոտ որոշակի կարծիք է ձևավորվել, թե ինչո՞ւ է Փաշինյանը սկսել անձնավորված խոսել։ «Հյուսիսային Եվրասիա» մայրցամաքային ինտեգրացիայի ուսումնասիրության և զարգացման կենտրոնի տնօրեն, բելառուս քաղաքագետ Ալեքսեյ Ձերմանտի կարծիքով Բելառուսի մասին Փաշինյանի ասածը թելադրված է Հայաստանի վարչապետի անձնական անապահովությամբ։ «Նա փորձում է տեղի ունեցողի պատասխանատվությունը (երկրի ներսում իր քաղաքականության դեմ բողոքի ակցիաները) գցել ուրիշների վրա՝ ՀԱՊԿ-ի, Ռուսաստանի, Բելառուսի, Լուկաշենկոյի վրա: Դա ժողովրդի մոտ իրեն արդարացնելու փորձ է իր քաղաքականության ձախողումների, պատերազմում պարտության և այն բանի համար, որ Հայաստանում առկա է հասարակության պառակտում»,- բացատրել է նա:
Ձերմանտը նաև նշել է, որ Բելառուսը հատուկ խաղաղապահ ջանքեր է գործադրել Հայաստանի և Ադրբեջանի միջև հարաբերությունները կայունացնելու համար։ Բայց Հայաստանի ղեկավարությունը մերժել է այդ նախաձեռնությունը, ինչը հանգեցրել է զինված բախման։ «Բելառուսը միշտ հայտարարել է, որ հարաբերություններ է պահպանելու և՛ Հայաստանի, և՛ Ադրբեջանի հետ և չի գործելու կամ-կամ սկզբունքով ընտրելով այս կամ այն կողմը, սակայն, ըստ ամենայնի, Հայաստանի ղեկավարությունը որոշել է դրա համար կշտամբել Բելառուսին», - նշել է նա։
Քաղաքագետը կարծում է, որ Հայաստանի ղեկավարության նման հռետորաբանությունը երջանիկ ավարտի չի բերի։ «Փաշինյանն այժմ փորձում է բոլոր պարտությունների ու անհաջողությունների մեղքը բարդել ուրիշների վրա, մասնավորապես Բելառուսի և նաև Ռուսաստանի վրա։ Դա կարող է հանգեցնել աղետալի հետևանքների: Դա էլ ավելի կնպաստի հայ հասարակության ներսում պառակտմանը և ավանդական դաշնակիցների հետ հարաբերությունների վատթարացմանը: Իսկ նորերը ի դեմս Ֆրանսիայի, ԱՄՆ-ի, Բրիտանիայի, Թուրքիայի դժվար թե կարողանան ապահովել Հայաստանի անվտանգությունը։ Ուստի, եթե Փաշինյանը շարունակի այսպես կառավարել Հայաստանը և չլսի հայ ժողովրդի մյուս հատվածին, որին դուր չեն գալիս նրա քաղաքական արկածներն ու սալտոները, դա կարող է հանգեցնել աղետի»,- հայտարարել է նա։
Նյութը հրապարակման պատրաստեց Կամո Խաչիկյանը
