ՔՊ-ի վախերը. մերժեցին ընդդիմության առաջարկը

Ինչպես և սպասվում էր Ազգային ժողովի խորհուրդը մերժել է ընդդիմության միջնորդությունը, արտահերթ նիստ հրավիրել ու քննարկել կառավարության հրաժարականի նոր կառավարություն ձևավորելու առաջարկը։

Ընդդիմադիր «Հայաստան» և «Պատիվ ունեմ» խմբակցությունները միջնորդություն են ներկայացրել ԱԺ՝ պահանջելով արտահերթ նիստ գումարել։ Ազգային ժողովի խորհուրդն էլ, որտեղ 15 անդամներից ընդդիմադիր են միայն երկուսը՝ խմբակցությունների ղեկավարները, միանգամից մերժել են, ըստ «Հայաստան» խմբակցության ղեկավար Սեյրան Օհանյանի՝ որևէ հիմնավոր պատճառ չնշելով։

Ընդդիմությունը խորհրդարան ներկայացրել էր 33 ստորագրություն, ըստ որի, հունիսի 17-ին արտահերթ նիստ է գումարվելու ընդդիմության ներկայացրած հայտարարությունը քննարկելու համար։ Իշխող մեծամասնությունն արդեն հայտարարել է, որ պարզապես չեն մասնակցելու այդ նիստին՝ դա ևս տապալելով։

Ազգային ժողովի արտահերթ նիստ գումարելու անհրաժեշտության մասին հայտարարել էր Բագրատ արքեպիսկոպոս Գալստանյանը։

Փաստացի ընդդիմության հերթական մարտավարական քայլը ձախողվել է։ Ավելին, ընդդիմությունը հնարավորություն չունի 36 ստորագրություն ներկայացնել խորհրդարանին՝ կառավարության հրաժարականի արտահերթ նիստ գումարելու պահանջով։

Նախկինում ընդդիմադիր պատգամավորներից մեկը, թեպետ Բագրատ Սրբազանի պնդմամբ, դեմ չէր միանալ, այլևս մտադիր չէ ստորագրել ընդդիմության առաջարկի տակ։ Այս փաստը վկայում է, որ իրավական ճանապարհ Նիկոլ Փաշինյանին իշխանությունից հեռացնելու, պարզապես գոյություն չունի։ Կգնա՞ արդյոք ընդդիմությունն առավել կոշտ գործողությունների, բարդ է ասել, հատկապես, որ վերջին օրերին հանրահավաքների մասնակցության թիվը շատ ավելի փոքր է, քան կցանկանար ընդդիմադիր շարժումը։

Ըստ Գալստանյանի՝ առանցքային է լինելու հունիսի 12-ը, երբ խորհրդարանում կառավարության հետ հարց ու պատասխանն է։ Իհարկե, իշխանությունն այս դեպքում էլ օգտվելու է ոստիկանների ծառայություններից։ 

Մանան Ավալյան