Հայաստանում կստեղծվի անվտանգության «լիովին նոր» կառույց
ՀԱՍԱՐԱԿՈՒԹՅՈՒՆ
Հայաստանի Ազգային ժողովի պաշտպանության և անվտանգության հանձնաժողովը հավանություն է տվել կառավարության ներկայացրած օրինագծին, ըստ որի` հանրապետությունում ոստիկանական գվարդիա է հայտնվելու։ Փաստաթուղթը ներկայացրել է ներքին գործերի փոխնախարար Արփինե Սարգսյանը, գրում է Eadaily.com-ը։
Նախկինում ուժային կառույցներում բարեփոխումների շրջանակներում ներքին զորքերը վերափոխվել էին ոստիկանական ուժերի։ Այժմ ոստիկանական գվարդիան կառանձնացվի նրանցից և կկենտրոնանա ներքին անվտանգության ապահովման վրա։ Ոստիկանության գվարդիայի գործառույթներն են լինելու հասարակական կարգի պահպանումը և հասարակական անվտանգության ապահովումը, պետական պահպանության ենթակա և ռազմավարական նշանակություն ունեցող օբյեկտների պաշտպանությունը, ինչպես նաև` հատուկ բեռների փոխադրման անվտանգության ապահովումը, ռազմական դրության իրավական ռեժիմի և արտակարգ դրության իրավական ռեժիմի ապահովումը, մասնակցությունը արտակարգ իրավիճակներում բնակչության պաշտպանությանը, հատուկ պետական պաշտպանության ենթակա անձանց անվտանգության ապահովումը: Ընդ որում` նրանք անմիջականորեն չեն մասնակցի մարտական գործողություններին, ինչպես առաջ էր ոստիկանական ուժերի դեպքում։ Օրենսդրական նախաձեռնությունը, ըստ ՆԳՆ-ի, առաջարկում է ուժի կիրառման ավելի հստակ չափորոշիչներ, որի շնորհիվ ոստիկանությունը ցանկացած պարագայում կգիտենա «ընդունելի գործողությունների» սահմանները։
Բացի այդ, ոստիկանական գվարդիայի հրամանատարին կնշանակի ոչ թե երկրի նախագահը, ինչպես դա այլ ուժային կառույցների դեպքում է, այլ ներքին գործերի նախարարը։ Նոր կառույցում կներառվեն Պետական անվտանգության գլխավոր վարչությունը, ինչպես նաև բարձրաստիճան պաշտոնյաներին ուղեկցող ճանապարհային ոստիկանության ստորաբաժանումը։ Նշվում է, որ գվարդիան լինելու է բոլորովին նոր կառույց, այլ ոչ թե ոստիկանական զորքերի իրավահաջորդը։
Կառավարությունը վստահ է, որ արդյունքում Հայաստանում կստեղծվի նոր զուտ ոստիկանական ծառայություն` ունակ լուծելու ներքին անվտանգության ապահովման խնդիրները հագեցած լինելով համապատասխան զինատեսակներով և համապատասխան պրոֆեսիոնալ կադրերով։
Սակայն այդ օրենսդրական նախաձեռնությունը քննադատության է արժանացել անգամ իշխող «Քաղաքացիական պայմանագիր» կուսակցության պատգամավորների կողմից: Այսպես, վարչապետ Նիկոլ Փաշինյանի կուսակից պատգամավոր Վիլեն Գաբրիելյանը մտահոգություն է հայտնել օրինագծի այն կետի առնչությամբ, որը գվարդիային ազատում է անհրաժեշտության դեպքում առաջնագծում մարտական գործողություններին մասնակցելուց։ Նրա կարծիքով, այդ կետն ու դրա բացատրությունները մեծ շփոթություն են առաջացնում։ «Նրանց փաստացի տրամադրվում է «բրոնյա» մարտական հավաքներին մասնակցելուց»,- ասել է պատգամավորը։
Խորհրդարանի կողմից հաստատվելու դեպքում օրինագիծն ուժի մեջ կմտնի 2024 թվականի սեպտեմբերի 1-ից։ Ոստիկանության գվարդիայի հրամանատարը կնշանակվի մինչև 2025 թվականի հունվարը: Նոր ուժային կառույցի վերջնական ձևավորումը նախատեսվում է ավարտել հրամանատարի նշանակումից հետո երկու ամսվա ընթացքում։
Նյութը հրապարակման պատրաստեց Կամո Խաչիկյանը
