Բագրատն ու նա
ՔԱՂԱՔԱԿԱՆՈՒԹՅՈՒՆ
ԱԺ «Հայաստան» խմբակցության պատգամավոր Արթուր Խաչատրյանը rg.ru-ի թղթակցի հետ զրույցում պատմել է, թե իրականում ի՞նչ է կատարվում Հայաստանում, ինչպիսի՞ հեռանկարներ կան քաղաքական անհանգիստ իրավիճակի զարգացման համար և ի՞նչ կփոխվի երկրում ընդդիմության հնարավոր իշխանության գալով։
- Նիկոլ Փաշինյանի իշխանության գալուց հետո Հայաստանում տեղի են ունենում ամենախոշոր բողոքի ցույցերը։ Ինչո՞ւ հիմա:
Արթուր Խաչատրյան.- Ներկայիս ընդդիմադիր շարժումը, որը ղեկավարում է Բագրատ արքեպիսկոպոսը, իսկապես աննախադեպ թվով մարդկանց է ներգրավել։ Դա տեղի է ունենում հիմա այն պատճառով, որ Փաշինյանը, Ադրբեջանի հետ սահմանը սահմանազատելու պատրվակով, գնում է միակողմանի զիջումների։ Ավելի ճիշտ նա պատրաստվում է կապիտուլյացիայի ենթարկել։ Եվ դա նա անում է զուտ օրուելյան ոճով դա ներկայացնելով որպես Հայաստանի հաղթանակ։
- Իշխանությունները կարծես թե չեն արձագանքում ժողովրդական լայնածավալ ցույցերին։ Ի՞նչ է լինելու հետո։
Արթուր Խաչատրյան.- Չէի ասի, որ իշխանությունները չեն արձագանքում: Դուք ինքներդ կարող եք տեսնել, թե որքան ոստիկան կա Երևանի փողոցներում։ Ընդդիմադիր ուժերի համախմբման գործընթաց է ընթանում: Ես հասկանում եմ, որ ժողովուրդը հենց հիմա է ուզում երկրում իշխանություն փոխել։ Բայց մենք դա պետք է անենք խաղաղ ճանապարհով և առանց երկիրը վտանգի ենթարկելու ստեղծելով ազգային միասնության ժամանակավոր կառավարություն և հետո նշանակելով ընտրություններ։ Կա իրավիճակի զարգացման մի քանի սցենար: Երկրի խորհրդարանում վարչապետի իմփիչմենթի ընթացակարգը սկսելու համար այս պահին պակասում է պատգամավորների 18 ձայն, բայց ժողովրդի ճնշման տակ միանգամայն հնարավոր է դա անել: Չէ՞ որ Հայաստանում դա մեկ անգամ չէ, որ եղել է։ Ինչքան առաջ գնա, այնքան շատ մարդիկ դուրս կգան փողոց, մինչև Փաշինյանի իշխանությունը հասկանա, որ ոստիկանական ուժերն անբավարար են իշխանությունը պահելու համար:
- Եթե ընդդիմությունը գա իշխանության, ի՞նչ կփոխվի հայաստանյան քաղաքականության մեջ:
Արթուր Խաչատրյան.- Շատ բան: Ի վերջո, Փաշինյանի օրոք Հայաստանը կորցրեց իր ռազմավարական գործընկերներին և ոչ մի լուրջ դաշնակից չստացավ։ Օրինակ Փաշինյանը փչացրեց հարաբերությունները Ռուսաստանի հետ, Իրանը միանշանակ հայտարարություններ է անում արտատարածաշրջանային ուժերի ներկայության դեմ։ Միևնույն ժամանակ, տեսանելի չէ Եվրոպայից մեր նկատմամբ որևէ լուրջ քայլ։ Ապրիլի 5-ին Բրյուսելում կայացել էր Հայաստան-ԵՄ-ԱՄՆ հանդիպումը, Փաշինյանը բեկում էր խոստացել, բայց դա չեղավ, նրանք մեզ հստակ հասկացրին, որ Հայաստանի անվտանգության առումով ամերիկացիներն ու եվրոպացիները ոչինչ չեն կարող երաշխավորել, մեզ բաց տեքստով ասացին, որ մոռանանք ԵՄ-ին անդամակցելու ցանկացած հեռանկարի մասին։ Ուստի ընդդիմությունը ելնում է նրանից, որ մեզ համար կարևոր է հարաբերությունների վերականգնումը մեր ռազմավարական դաշնակիցների՝ Ռուսաստանի և Իրանի հետ։
- ՀԱՊԿ-ի ֆինանսավորումը սառեցնելու Փաշինյանի վերջին որոշումից հետո Երևանում մի շարք արևմտամետ քաղաքական գործիչներ սկսել են խոսել նաև երկրի ԵԱՏՄ-ից դուրս գալու անհրաժեշտության մասին։ Ինչպե՞ս դա կարող է ազդել Հայաստանի տնտեսության վրա։
Արթուր Խաչատրյան.- Այսօր թղթի վրա Հայաստանի տնտեսությունն աճում է, բայց իրականում բոլորս էլ հասկանում ենք, որ դա թելից է կախված։ Մասնավորապես Ռուսաստան վերաարտահանում-վերաներմուծումից։ Մեր երկկողմանի առևտրաշրջանառությունը 2023 թվականին կազմել է մոտ 7,2 միլիարդ դոլար, ինչը մեզ համար մեծ գումար է։ Հայաստանն այդ ամենից միջնորդավճար է ստանում։ Ինչն, ի դեպ, ինչպես ազգային եկամուտների բաշխումը, չափազանց անհավասար է և կենտրոնացված է վերնախավերի մեջ։ ԵԱՏՄ-ից Հայաստանի դուրս գալը մեզ համար ուղղակի աղետ կլինի; Ի վերջո, դա շուկա է, որտեղ կարելի է վաճառել մեր ապրանքներն ու ծառայությունները, և դա ի տարբերություն Եվրոպայի։
Նյութը հրապարակման պատրաստեց Կամո Խաչիկյանը
