Անսովոր չափսերով և արտաքինով թիթեռը մարդկանց մոտ սարսափ է առաջացրել

Մադաթափա լիճը տարածքի այցեքարտն է, և այս լճի շնորհիվ տարածքում և լճին հարակից բնակավայրերում կենսաբազմազանությունը բազմազան է, նմանը չունեցող և այստեղ հնարավոր է հայտնվեն ամենաանսովոր հյուրերը։

NOR ռադիոկայանի լրագրողին էին դիմել բնակիչները, որպեսզի զուտ հետաքրքրասիրության տեսանկյունից նկարենք և լուսաբանենք։

Հիմա ընթերցողին հետաքրքրում է, թե ի՞նչ թիթեռ է սա, եթե անկեղծ` մեզ էլ էր հետաքրքիր, երբ գնացինք լուսանկարելու։

Լուսանկարելուց հետո փորձեցինք մանրամասներ գտնել այս <<հրեշի>> մասին։

Թիթեռի անունը <<Մեռած գլուխ>> է, անվանումը ստացել է մեջքին պատկերված գանգի շնորհիվ։

Մեռած գլուխը իր մեծությամբ համարվում է երկրորդը Եվրոպայում և առաջինը մարմնի չափսերով։ Թիթեռի թեւերի բացվածքը 13 սմ է, նա թռչում է ժամում մինչև 50 կմ արագությամբ։ Թիթեռը ունի արտասովոր ձայնի օրգան, որը գտնվում է կոկորդում: Եթե ​​նա վտանգի մեջ է, կամ հուզական վիճակում է, ապա կարող է ճռոցի ձայն հանել։

Մեռած գլխի շուրջ մարդիկ մի շարք առասպելներ են ստեղծել՝ դրան վերագրելով միստիկական ունակություններ։

Հավատալիքներ. Ենթադրվում էր, որ այս թիթեռը մահվան կամ հիվանդության խորհրդանիշն է և ավետաբերը։

Թիթեռը միանգամից ածում է մոտ 150 ձու և դրանք դնում տերևի հակառակ կողմում։ Թրթուրները դուրս են գալիս ձվերից 8 շաբաթ անց։ 15-40 սմ խորության հողում գոյատևում են ձմռանը, իսկ գարնանը նրանցից թիթեռներ են դուրս գալիս։ Թրթուրները ամենակեր են։

Արեւադարձային եւ մերձարեւադարձային շրջաններում թիթեռները բազմանում են ամբողջ տարվա ընթացքում, կարող է առաջանալ առանձնյակների 2-3 սերունդ։

Թիթեռները դուրս են թռչում երեկոյան և ակտիվ են մինչև կեսգիշեր: Կարճ և հաստ լեզվի պատճառով նրանք չեն կարող սնվել ծաղիկների նեկտարով, նրանց սննդակարգը բաղկացած է վնասված մրգերից կամ ծառի հյութից։

Նրանք շատ են սիրում մեղրը և ճանապարհ են ընկնում դեպի փեթակ՝ հյուրասիրվելու մեղրով: Թիթեռների համար մեղուների խայթոցները վտանգավոր չեն: