Համառոտ ամփոփում ՀՀ մրցակցային դատավարության դրսևորումներից. Հովհաննես Քոչարյան

Հովհաննես Քոչարյանը իր ֆեյսբուքյան էջում գրում է.

Քրեական գործերով դատարանները, որպես կանոն, մեղադրանքի կողմի վկայի նախաքննական ցուցմունքները հրապարակում են ամեն գնով: Կան հակասություններ վկայի դատաքննական ցուցմունքների հետ, թե չկան, էական են այդ հակասությունները, թե ոչ, դատարաններին շատ չի հուզում: Նույնիսկ դեպքի հանգամանքների լիակատար մոռացությունը դատարանները համարում են վկայի նախաքննական ցուցմունքների հրապարակման պատշաճ առիթ: Ասում են դա էլ է հակասություն տրամաբանական օրենքները այս պարագայում չեն գործում: Դե...պիտի ինչ-որ ձևով հաղթահարվի վկայի տոտալ «ամնեզիան»: Բայց Աստված չանի, որ ցուցմունքների հրապարակումից հետո վկան հանդիսավոր կերպով չարտասանի «ՊՆԴՈՒՄ ԵՄ ՆԱԽԱՔՆՆԱԿԱՆ ՑՈՒՑՄՈՒՆՔՆԵՐՍ» մոգական բառերը: Սկսվում է վկայի բմբլահանման կամ հիպնոսի պրոցեսը, մեղադրանքի կողմի պրեսինգին միանում է դատարանը, վկային մի քանի անգամ հիշեցնում են սուտ ցուցմունքի համար պատասխանատվության մասին, բորբոքվում են բոլոր հնարավոր կրքերը, հնչում են հին աստվածների անեծքները, ապացուցման պրոցեսը վերածվում է ինկվիզիցիայի, հարցաքննությունը եզրափակելու սրբազան առաքելությունն իր ձեռքն է վերցնում մեղադրող դարձած դատարանը: Բա որ էսքանից հետո էլ կոշտ պրոցեդուրան մի կերպ վերապրած ու շոկի մեջ գտնվող վկան չի ֆայմում ու չի ֆայմում արտասանի «ՊՆԴՈՒՄ ԵՄ ՆԱԽԱՔՆՆԱԿԱՆ ՑՈՒՑՄՈՒՆՔՆԵՐՍ» մոգական բառերը: 
 Վերջ, կատաստրոֆա, գեպոլիտիկ ՉՊ...
________________
Բարև, Տորքվեմադա