Տավուշցիները գիտակցում են, որ Փաշինյանը եկել էր իրենց գլխի տակ փափուկ բարձ դնելու. Պետրոսյան

Երեկ Նիկոլ Փաշինյանը կրկին Տավուշի մարզում էր: Նրա՝ մարտի 18-ի հանդիպումից հետո բազմաթիվ լրատվամիջոցներով և սոցցանցերով հայտարարություններ էին տարածվում, որ ոսկեպարցիները պայքարում են, իրենք էին ասում, որ դուրս չեն գալու գյուղից, որ վարչապետի «հանձման քաղաքականության» հետ համաձայն չեն և այլն: Սակայն երեկ Փաշինյանը հայտարարեց, որ ոսկեպարցիների հետ ամեն ինչ հասկանալի է, և անհամաձայնությունը հիմնականում Կիրանցի և Բերքաբերի բնակիչների հետ է: Քաղաքական գործիչ, քաղաքագետ Սուրեն Պետրոսյանը Փաշինյանի՝ տարածքներ հանձնելու մտադրության մասին իմանալուց հետո Տավուշում էր` Ոսկեպարում, իր գնահատմամբ՝ բնակիչների կողքին լինելու և գյուղերի հանձնումը կանխելու համար:

1or.am-ը Պետրոսյանից հետաքրքրվեց, թե ինչպե՞ս եղավ, որ ոսկեպարցիները տրամադրվածությունը փոխեցին: «Եկավ, հանդիպեց ոսկեպարցիների արդար ցասմանը, լուրջ դիմադրություն կար, հասկացավ, որ ամենաճիշտը կրկին խաբելն է: Հայտարարեց, որ նախորդ հանդիպման ժամանակ բարձրացված բոլոր խնդիրներն իրենց լուծումները կստանան, բոլորի պահանջները բավարարելու է: Իրականում փորձում էր բոլորի գլխի տակ փափուկ բարձ դնել, բայց իրեն չեն վստահում ու չեն հավատում: Դեռ 10 օր առաջ երաշխավորում էր, որ պատերազմ է լինելու և դրան մասնակցելու են Թուրքիան, Պակիստանը և այլն: Հիմա էլ եկել ասում է, որ կարող են միասին 50 մետրի վրա ապրել»,- մանրամասնեց Պետրոսյանը:

Վերջինիս գնահատմամբ՝ ոսկեպարցիները մինչև այսօր կարողացել են կասեցնել իրենց նկատմամբ ճնշումը, հողերի, իրենց տների հանձնումը, կոտրվեց այն միֆը, որ քաղաքացուց, ժողովրդից ոչինչ կախված չէ. «Մինչև հիմա հանձման գործընթաց տեղի չի ունեցել, քանի որ կար պայքար: Իհարկե, պետք է արձանագրել, որ հիմա թևակոխում ենք պայքարի նոր փուլ: Ում հետ խոսում եմ, գիտեն, որ Փաշինյանի հերթական կեղծիքն է»: Քաղաքագետն այնտեղ շատ ակնառու և վտանգավոր խնդիր է նկատել. «Իշխանությունը փորձում է ամեն կերպ իրար դեմ տրամադրել գյուղերի բնակիչներին: Ասում է մի գյուղից ինչ-որ տարածք են տալու, որ մեկ այլ գյուղի ճանապարհ պահեն: Մարդիկ էլ մտածում են՝ ինչու իրենց գյուղից տարածք տան մյուսի համար: Հայտարարում են, որ սահմանագծման և սահմանազատման աշխատանքներին պետք է գյուղացիներից մարդիկ ներգրավվեն, որն ամենասխալն է: Սա ևս թշնամացնելու է այդ մարդկանց մյուս գյուղացիների հետ»:

Ըստ Սուրեն Պետրոսյանի՝ պայքարը պետք է սկսվի Տավուշից, իսկ կնիքը դրվի Երևանում: Խոսք է գնացել նաև այլընտրանքային ճանապարհ կառուցելու մասին, բայց փորձել է համոզել, որ միջպետական ճանապարհը ևս մնալու է մեզ, սակայն գյուղացիները չեն համաձայնել, ինքն էլ հայտարարել է, թե չեն կառուցի: Պետրոսյանի խոսքով՝ առանց հեռախոսի և տեսանկարահանման սարքերի, բնակիչները կարողացել են մտնել հանդիպման, սակայն անվտանգության աշխատակիցները հայտարարել են, որ միայն Սուրեն Պետրոսյանի մուտքն է խստիվ արգելվում: