Մեր պայքարը ճշմարտության համար է, որը որոշ մարդկանց ուղեղում արժեք չունի. Բագրատ Սրբազանը՝ Ոսկեպարում ակցիայի մասնակիցներին

Տավուշի մարզի Ոսկեպար համայնքում ակցիա է` ի պաշտպանություն Տավուշի մարզի այն տարածքների, որոնք ՀՀ իշխանությունը պատրաստվում է հանձնել Ադրբեջանին։

«Յուրաքանչյուր մարդ զոհված զինծառայողների մայրերի, հայրերի ձեռքերին պետք է խոնարհվի: Եթե մենք նրանց չգնահատենք, ուրիշ ոչինչ արժեք չի ունենա: Այս հայահավաք հանրահավաքն ուղղակի հանդիպում է»,- հայտարարել է Տավուշի թեմի առաջնորդ Բագրատ Սրբազանը:

«Այս շարժումն, ի վերջո, իր նպատակին ծառայելու է, որի վերջին հանգրվանը ոչ վերացական, այլ շատ շոշափելի հաղթանակն է: Մեր նշանաբանն է՝ պատիվ  և հայրենիք, մեր շարժումն է՝ հանուն հայրենիքի, հանուն Աստծո, հանուն արդարության ու ճշմարտության, առանց որոնց չկա խաղաղություն և առանց որոնց ոչ մի արժեք նշանակություն չունի մեր կյանքում:

Մեր պայքարը ճշմարտության համար է, որը որոշ մարդկանց ուղեղում արժեք չունի: Բայց դա մեր արժեքն է, ուրիշ շեղվելու տեղ չունենք: Մենք կա՛մ ստի հետ ենք, կա՛մ ճշմարտության: Մեր պայքարը հոգևոր է: Եթե այդտեղ հաղթեցինք, մեր առջև էլ որևէ արգելք չի կարող, լինել»,-նշեց նա:

Ոսկեպար են ժամանել ՀՅԴ բյուրոյի անդամ Հրանտ Մարգարյանը, ԱԺ պատգամավորներ Գեղամ Մանուկյանը, Գառնիկ Դանիելյանը, Ասպրամ Կրպեյանը, «Բաբոն տեր է» և «ՀայաՔվե» նախաձեռնությունների անդամներ, մշակույթի գործիչներ, երգիչներ, սովորական քաղաքացիներ։

Հնչում է ազգային երգ ու երաժշտություն։ Հավաքվածները պարում են քոչարի ու յարխուշտա։ Երգում են Արթուր Խաչենցն ու Արսեն Գրիգորյանը` Մրոն։

Նշենք, որ ակցիան կազմակերպել է «Տավուշը հանուն հայրենքի» նախաձեռնությունը` այն համոզմունքով, որ արյունով ազատագրված տարածքները ստորագրությամբ չպիտի հանձնվեն։