Ռուս կինն անկեղծորեն պատմել է հայաստանյան կյանքի մասին
ՀԱՍԱՐԱԿՈՒԹՅՈՒՆ
Եկատերինա անունով Սանկտ Պետերբուրգի մի նախկին բնակչուհի, ով մի քանի տարի առաջ ամուսնու և երեխայի հետ տեղափոխվել է Հայաստան, կիսվել է իր տպավորություններով:
Իր սոցիալական ցանցի էջում նա անկեղծորեն թվարկել է այն ամենը, ինչ իրեն դուր է եկել և դուր չի եկել մեր երկրում:
Ըստ հեղինակի` առավելությունները շատ ավելին են, քան թերությունները,- գրում է 78.ru-ն։ Որպես դրական կողմեր նա նշել է ցնցող բնությունը և տպավորիչ պատմական ժառանգությունը:
«Հայաստանը պարզապես իդեալական երկիր է հարմարավետ ճանապարհորդությունների համար, օրինակ ընտանիքի հետ, և նաև բոլոր նրանց համար, ովքեր հետաքրքրված են բնությամբ, ինչպես նաև նրանց համար, ովքեր գնահատում են հինավուրց վանքերը»,-գրել է նա:
Բացի այդ, ռուս կինը շատ տպավորված է տեղի բնակիչների հյուրընկալությամբ և հարգանքով, որոնք միշտ պատրաստ են օգնել այցելուներին։
«Հայերն իրենք են ասում, որ խաբեբաները շատ են։ Բայց անձամբ մենք միայն ազնիվ, պատասխանատու մարդկանց ենք հանդիպել, որոնց հետ շատ հաճելի է գործ ունենալ»,- պարզաբանել է Եկատերինան։
Մեկ այլ հաճելի գործոն է բացարձակ անվտանգությունը ինչպես մեծ, այնպես էլ փոքր քաղաքներում։
«Չկան հարբեցողներ, տականքներ, վիրավորված պարտվողներ և ագրեսիվ երիտասարդներ»,- գրել է ռելոկանտը,-«դա հատկապես աչքի է ընկնում Ռուսաստանի գավառների համեմատությամբ, որտեղ անընդհատ տարբեր տեսակի ագրեսիաների ես բախվում»։
Բայց բացասական կողմերից նույնպես հնարավոր չի եղել խուսափել.
«Ռուսաստանցիների համար գլխավոր հիասթափությունը հասարակական տրանսպորտն է, ինչպես նաև ճանապարհները, ավելի ճիշտ դրանց սարսափելի վիճակը, բացի այդ, հայ վարորդներն ընդհանրապես չեն մտածում ուղևորների անվտանգության մասին»,-պնդել է հեղինակը,-«չգիտես ինչու, մեքենաների մեծ մասի հետևի ամրագոտիները կտրված են, այնպես որ դուք պետք է երեխային կրեք ձեր գրկում, ինչպես տեղացիները, դա այնքան սարսափելի է»:
Ի թիվս այլ բացասական կողմերի, նա նշել է երեխայի սոցիալականացման հետ կապված դժվարությունները, քանի որ հայ տղաները հակված են կռվելու ինչ որ պատճառով կամ առանց պատճառի։
Միևնույն ժամանակ, երեխաները, նույնիսկ շատ փոքրերը, հաճախ են զբոսնում ինքնուրույն, առանց մեծահասակների հսկողության, իսկ աղջիկներին շատ հազվադեպ են թույլ տալիս ընդհանրապես զբոսնել:
Նյութը հրապարակման պատրաստեց Կամո Խաչիկյանը
