Հայաստանը հավաքական Արևմուտքի կողմից դիտարկվում է հակառուսական և հակաիրանական հարթակ, ինչը լուրջ վտանգներ է պարունակում մեզ համար․ Վարդան Ոսկանյան
ՔԱՂԱՔԱԿԱՆՈՒԹՅՈՒՆ
«Հայաստանի շահերից բխող տեսլականը չի ենթադրում հարաբերությունների վատթարացում հարևան Իրանի, նաև՝ Ռուսաստանի հետ: Առհասարակ, որևէ քաղաքականություն, որը միտված կլինի խաղալու տարբեր ուժերի հակասությունների վրա, ըստ էության, վնասակար է Հայաստանի համար»,- 168.am-ի հետ զրույցում նշել է իրանագետ Վարդան Ոսկանյանը:
Վարդան Ոսկանյանը շեշտել է՝ հենց այդ հանգամանքը հաշվի առնելով է, որ ՀՀ-ն պետք է որդեգրի երկխոսության և համագործակցության հարթակ դառնալու քաղաքականություն:
ՆԱՏՕ-ի տարածաշրջանային ակտիվության վերաբերյալ Իրանից բաց տեքստերով հնչած մտահոգությունների, ինչպես նաև նույն համատեքստում ՆԱՏՕ-ի գլխավոր քարտուղար Յենս Ստոլտենբերգի Հայաստան այցին անդրադառնալով՝ իրանագետը նկատել է, որ ՆԱՏՕ-ի հետ համագործակցություն ՀՀ-ն մշտապես ունեցել է, բայց այդ համագործակցությունն այնպես է ներկայացվել գործընկերներին, որ որևէ խնդիր չի առաջացրել Հայաստանի համար:
«Իսկ այժմ նույնիսկ անզեն աչքով երևում է, որ ՀՀ-ն հավաքական Արևմուտքի կողմից դիտարկվում է հակառուսական և հակաիրանական հարթակ, ինչը լուրջ վտանգներ կարող է պարունակել մեզ համար»,- հավելել է նա՝ հիշեցնելով տարբեր հայտարարություններ՝ այդ թվում՝ իրանական կողմից, որ արտատարածաշրջանային ուժերը չպետք է ունենան լուրջ դերակատարություն։
«Պարզ է, որ Իրանում անհանգստացած են այն հանգամանքից, որ ՀՀ-ն կարող է դիտարկվել որպես հակաիրանական հարթակ, հետևաբար՝ այստեղ անելիք կա երկու ուղղությամբ: Առաջինը՝ հստակեցնել ՀՀ քաղաքականությունը, որովհետև միջազգային հարաբերություններում գավառական խորամանկությամբ շատ առաջ չես գնա, և պետք է հստակ, գործընկերների համար հասկանալի քաղաքականություն, և երկրորդը՝ ՆԱՏՕ-ի հետ հարաբերությունների համատեքստը սպառնալիքից փոխել հնարավորության»,- ասել է նա:
Վարդան Ոսկանյանը, սակայն, չի կարծում, թե սա ի վիճակի են անել ՀՀ գործող իշխանությունները, քանի որ այս իշխանությունները տապալել են բոլոր ուղղությունները:
«Հայաստանը, այո՛, կարո՛ղ է, և պե՛տք է համագործակցի բոլոր խաղացողների հետ, բայց այդ համագործակցությունը չպետք է սպառնալիք լինի որևէ այլ կողմի համար, իսկ միայն բանավոր հավաստիացումներն այս տիրույթում բավարար չեն»,- ամփոփել է իրանագետը:
Հիշեցնենք՝ դեռ նախորդ տարի Իրանի նախագահ Էբրահիմ Ռայիսին ՀՀ Ախ քարտուղար Արմեն Գրիգորյանի, ինչպես նաև Ադրբեջանի նախագահի ներկայացուցիչ Խալաֆ Խալաֆովի հետ հանդիպումների ժամանակ շեշտել էր՝ տարածաշրջանում Իրանի համար անընդունելի է ՆԱՏՕ-ի ուժերի ներկայությունը:
