Եթե միջազգային գործընկերները բարձր գին դնեն Ադրբեջանի գործողությունների վրա, Ադրբեջանը չի հարձակվելու. Արտակ Բեգլարյան
ՀԱՍԱՐԱԿՈՒԹՅՈՒՆ
Առանց Հայաստանի պաշտոնական աջակցության, ինչ իշխանություն էլ լիներ Արցախում, այս աշխարհաքաղաքական պայմաններում իրատեսական չէր...
Առանց Հայաստանի պաշտոնական աջակցության, ինչ իշխանություն էլ լիներ Արցախում, այս աշխարհաքաղաքական պայմաններում իրատեսական չէր հաջողության հասնել: Շատ կարեւոր է, որ Հայաստանի պաշտոնական դիրքորոշումը լիներ կուռ եւ չպետք է տաներ Արցախի կորստին: Այս մասին այսօր՝ մարտի 20-ին, Ազատության հրապարակում Արցախի ժողովրդի կարիքների ապահովման նախաձեռնության հանրահավաքից հետո լրագրողների հետ զրույցում նշեց Արցախի նախկին պետնախարար Արտակ Բեգլարյանը:
Անդրադառնալով Տավուշում ստեղծված վիճակին եւ Ադրբեջանի կողմից հարձակման վտանգին, նա ասաց, որ դա կարելի է կանխել միջազգային հարաբերություններով, դիվանագիտության, բանակը հզորացնելով, միջազգային գործընկերների հետ համապատասխան հարաբերություններ վարելով լրացուցիչ երաշխիքներ ստանալ, որ հարձակում չի լինելու: «Եվ ներքին դիմադրողականությունը պետք է բարձրացնել, եւ արտաքին դիմադրողականությունը: Հասկանալի է, որ եթե միջազգային գործընկերները բարձր գին դնեն Ադրբեջանի գործողությունների վրա, Ադրբեջանը չի հարձակվելու: Ես դրա հնարավորությունները տեսնում եմ, ուղղակի դրա համար պետք է պատշաճ հաղորդակցություն վարել գործընկերների հետ եւ փակ, եւ բաց ձեւաչափով»:
Ինչ վերաբերում է Բաքվում գտնվող հայ գերիների խնդրին, Բեգլարյանն ասաց. «Ես ինքս չեմ տեսնում, որ ՀՀ իշխանությունն այն է անում, ինչը ես կպատկերացնեի, որ կանեն:
Չեմ կարծում, որ բավական ջանք գործադրվել է, իհարկե, դրա համար բավականին լուրջ միջազգային ճնշում է պետք: Իսկ միջազգային ճնշման համար մենք պետք է ճնշենք, օգտագործելով բոլոր հնարավոր մեխանիզմները: Մյուս տարբերակը Ադրբեջանի հետ բանակցելն է, քաղաքական առեւտուր անելն է, որը արվեց դեկտեմբերին»:
