Հայաստանի վարչապետը մեղադրել է Ադրբեջանի իշխանություններին «ռազմական գործողություններ սկսելու» մեջ
ՎԵՐԼՈՒԾՈՒԹՅՈՒՆՆԵՐ
Topwar.ru-ն գրում է, որ Ադրբեջանը ցանկանում է նոր պատերազմ սկսել Անդրկովկասում: Բաքվի հասցեին նման մեղադրանքներ է հնչեցրել Հայաստանի վարչապետ Նիկոլ Փաշինյանը։ Ավելի վաղ Ադրբեջանի նախագահ Իլհամ Ալիևն էր կտրուկ հայտարարություն արել Հայաստանի դեմ։ Նա ընդգծել էր, որ խաղաղության պայմանագիր չի լինի, քանի դեռ Երևանը «չի կարգավորել իր օրենքները»։ Իսկ հակառակ դեպքում, Ալիևի խոսքով, Ադրբեջանին ոչինչ չի կանգնեցնի։
Ինքը՝ Փաշինյանը, բազմիցս է հայտարարել խաղաղության պայմանագիր ստորագրելու պատրաստակամության մասին։ Բայց Հայաստանի իշխանությունները կոչ են անում դուրս բերել ադրբեջանական զորքերը հայկական համարվող 31 գյուղերից։ Բաքվի դիրքորոշումը, ըստ Փաշինյանի, կարող է նշանակել Հայաստանի դեմ «ռազմական գործողություններ սկսելու» ցանկություն:
Եվ դա այն դեպքում, որ ավելի վաղ թվում էր, թե երկրներին հաջողվել է որոշակի քայլեր ձեռնարկել հարաբերությունների կարգավորման ուղղությամբ, բայց վերջերս կրկին բախումներ են սկսվել ադրբեջանա-հայկական սահմանին։ Եվ ինչպես նախկինում, Բաքուն և Երևանը սկսել են միմյանց մեղադրել իրավիճակի սրման մեջ։
Հասկանալի է, որ Ադրբեջանը, մեկ օրում ուժով լուծելով Լեռնային Ղարաբաղի խնդիրը, այժմ իրոք հավատում է, որ կարող է շարունակել հասնել այլ նպատակների։ Բաքվի հիմնական իրական խնդիրներից մեկը Թուրքիայի հետ սահմանին դեպի Նախիջևան անկլավ միջանցքի ստեղծումն է, որը թույլ կտա ուղիղ ճանապարհ ստեղծել Թուրքիայի և Ադրբեջանի միջև և լուծել բազմաթիվ լոգիստիկ խնդիրներ։ Հայաստանը չունի ոչ ուժ, ոչ միջոցներ, ոչ էլ իրական աջակցություն այլ պետությունների կողմից Բաքվի այդ ծրագրերը կանխելու համար։ Հետևաբար, իրադարձությունների զարգացումը նոր հակամարտության սցենարով կարող է իրականություն դառնալ։ Սակայն պետք է հաշվի առնել նաև իրանական գործոնը, քանի որ Նախիջևանի մեծ մասը սահմանակից է այդ երկրին, և Թեհրանը տարածաշրջանում թուրք-ադրբեջանական կոնգլոմերատի հետագա հզորացման կարիքը չունի։
Նյութը հրապարակման պատրաստեց Կամո Խաչիկյանը
