Պատժվում են մարդիկ, որոնք չեն գողացել, կամ ապացուցված չէ, որ գողացել են․ Վահան Քերոբյան

Ինտենսիվ այգիների ծրագրով 100 մլրդ դրամի մոբիլիզացիա է եղել, իսկ վերջերս իրավապահների հայտնաբերված խախտումները վերաբերում են ընդամենը հնարավոր 234 մլն դրամի խախտման, որ ընդհանուր ծավալի 0,2 %-ն է։

Այս մասին Կառավարության նիստում ասաց էկոնոմիկայի նախարար Վահան Քերոբյանը։

«Սովորական բանկերը, որ վարկավորում են անում, 2-3% դնում են, որ այդքանը կորչի։ Այստեղ չարաշահումները, որոնց մասին խոսք է գնում, ոչ թե գողության մասին է, այլ շահառուների խարդախության, ու եթե դրա համար պատժվում են մարդիկ, որոնք չեն գողացել, կամ ապացուցված չէ, որ գողացել են, ստացվում է՝ պարալիզացնում ենք ամբողջ պետական համակարգի աշխատանքը»,- հայտարարեց նախարարը։

Քերոբյանն ասաց, որ իրեն գյուղատնտեսական վարչությունները հարց են տալիս՝ ինչպես շարունակեն աշխատել, որ վստահ լինեն, որ ազնիվ աշխատանքը վերջում չի պատժվելու։

Ըստ նրա՝ մշակութային փոփոխություն պետք է անել. հասկանալ՝ թո՞ւյլ ենք տալիս, որ մարդիկ սխալներ թույլ տան երբեմն։

«Չնայած, այս պարագայում, վստահ եմ, կպարզվի, որ այդպիսի սխալներ էլ չկան առանձնապես»,- նշեց էկոնոմիկայի նախախարը։

Հիշեցնենք, որ Էկոնոմիկայի նախարարությունում ենթադրյալ չարաշահումների դեպքի առթիվ նախաձեռնված քրեական վարույթների շրջանակներում ձերբակալվել են փոխնախարարի պաշտոնից ազատված Իսպիրյանը և այլ անձինք, որոնց թվում՝ Ազգային ժողովի նախագահ Ալեն Սիմոնյանի եղբոր կինը՝ Անի Գևորգյանը։ Վերջինիս նկատմամբ խափանման միջոց է ընտրվել կալանավորումը՝ 2 ամիս ժամկետով, կալանավորվել է նաև «Սիներջի» ընկերության հիմնադիր Աշոտ Հովհաննիսյանը։

Քրեական վարույթներից մեկն էլ վերաբերում էր ինտենսիվ այգիների ծրագրերում հայտնաբերված ենթադրյալ չարաշահումների մասին։