ՔՊ-ում ներկլանային պայքարը հասել է եռման կետին

«Քաղաքացիական պայմանագիր» կուսակցությունում ներկլանային պայքարը հասել է բավականին լուրջ թեժացման։ Երեկ էկոնոմիկայի նախարարության շուրջ տեղի ունեցող իրադարձությունները վկայում էին, որ Փաշինյանն առանձնապես մտադիր չէ հանգիստ հետևել իր իշխանության մեջ կատարվող իրադարձություններին և պատժելու է բոլորին, ովքեր դուրս են գալիս իր ենթակայությունից։

Հիշեցնենք՝ նախ աշխատանքից ազատեցին էկոնոմիկայի փոխնախարար Անի Իսպիրյանին, ապա և ԱԱԾ-ն ու քննչական կոմիտեն ներխուժեցին նախարարություն՝ խուզարկություններ իրականացնելով թե՛ ներսում, թե՛ 15 այլ վայրերում։ Արդյունքում վարչության պետերից մեկին և փոխնախարարին ձերբակալել են՝ բավականին լուրջ չարաշահումների մեղադրանք առաջադրել։

Անի Իսպիրայնը տակավին մեկ ամիս առաջ նշանակվել էր պետական հետաքրքրությունների ֆոնդի գործադիր տնօրենների խորհրդի նախագահի պաշտոնում։ Մինչ այդ, այդ պաշտոնը զբաղեցնում էր Տիգրան Ավինյանը։ Իսպիրյանը «Ի գործ» ծրագրով Հայաստան գալով՝ կարճ ժամանակում բավականին լուրջ կարիերայի աճ էր գրանցել և նախարարությունում համարվում էր հենց Ավինյանի հովանավորյալը։ Փաստացի այս ձերբակալությամբ Փաշինյանը լուրջ հարված է հասցնում Տիգրան Ավինյանին։ Վերջինիս, ի դեպ, նախօրեին հրավիրել էին Ազգային ժողով և բավականին կոշտ խոսակցություն էր եղել Երևանի քաղաքապետի ու «Քաղաքացիական պայմանգիր» խնբակցության անդամների միջև։ Նույն այդ ընթացքում, երեկ հայտնի դարձավ, որ ձերբակալվել է Ազգային ժողովի նախագահ Ալեն Սիմոնյանի եղբոր կինը՝ Անի Գևորգյանը։ Ձերբակալության մասին դեռևս մանրամասներ հայտնի չէ, ըստ փաստաբանի, կապված է նախկին աշխատավայրի հետ։ Այդ ընթացքում, մինչ Ավինյանը և Ալեն Սիմոնյանը տվայտվում էին իշխանության հարվածներից, Նիկոլ Փաշինյանը կնոջ հետ համերգի էր գնացել, նրա ծնունդը շնորհավորել, Աննա Հակոբյանն էլ նոր ֆոտոշարք էր հրապարակել, կարծես հասկացնելով, թե ով է կանգնած այս ամենի ետևում։

Անահիտ Մանուկյան