Տարածաշրջանում կրքերը թեժանում են, չի բացառվում, որ բախումների մասշտաբը կտրուկ ընդլայնվի․ Տիգրան Աբրահամյան
ՀԱՍԱՐԱԿՈՒԹՅՈՒՆ
ԱԺ «Պատիվ ունեմ» խմբակցության պատգամավոր Տիգրան Աբրահամյանը, վերլուծելով աշխարհաքաղաքական զարգացումները, ընդգծում է՝ եթե բախումների մասշտաբն ընդլայնվի, կարելի է պատկերացնել, թե դա ինչ ազդեցություն կունենա հատկապես Հայաստանի վրա։
«Սիրիայի մայրաքաղաքում իրականացված հարձակման հետևանքով Իրանի Իսլամական հեղափոխության պահապանների կորպուսի բարձրաստիճան սպաներ են զոհվել:
Հարվածի հետևանքով կորուստներ ունի նաև սիրիական կողմը:
Այս կորպուսի մարտիկներն ու բարձրաստիճան սպաներն անընդհատ թիրախում են, որովհետև նրա առանձին ստորաբաժանումներ պատասխանատու են տարբեր երկրներում իրականացվող հատուկ օպերացիաների համար, իսկ թիրախում տարբեր երկրների հովանավորչությամբ գործող ահաբեկչական ցանցերն են:
Հիշեցնեմ, որ տարեսկզբին Իրանում ահաբեկչություն էր իրականացվել` հայտնի հրամանատար Ղասեմ Սոլեյմանիի հերթական տարելիցի հիշատակման օրը, ինչից հետո Իրանի ամենամարտունակ միավորումը` Իրանի Իսլամական հեղափոխության պահապանների կորպուսը, պատժիչ հակաահաբեկչական գործողություններ է իրականացնում աշխարհի տարբեր կետերում:
Տարածաշրջանում կրքերը բավականին թեժանում են և չի բացառվում, որ միմյանց դեմ օգտագործվող հարվածներն առավել վտանգավոր ծավալների հասնեն, իսկ բախումների մասշտաբը կտրուկ ընդլայնվի:
Միայն կարելի է պատկերացնել, թե դա ինչ ազդեցություն կունենա Հարավային Հովկասի վրա, հատկապես Հայաստանի, որի իշխանությունը փոշիացրել է պետության իմունիտետը և կույր աչքերով սլանում է թշնամիների գիրկը»,- սոցցանցի իր էջում գրել է Տիգրան Աբրահամյանը:
