Փաշինյանի վարքը ցուցադրություն էր, քաղաքական գովազդ, թեմաներից շեղում. Թեւան Պողոսյան

Եթե մեզ թվում է, որ 2026 թվականի ընտրությունները հեռու են, ապա այդպես չէ. քաղաքական գործիչները միշտ մտածում են հաջորդ ընտրությունների մասին, պետական գործիչները՝ հաջորդ սերունդների մասին: Այս մասին NEWS.am-ի հետ զրույցում նշեց քաղաքագետ Թեւան Պողոսյանը:

«Հիմա մենք ոչ թե մտածում ենք՝ ո՞նց անենք, որ վերականգնենք հայրենիքը, ոնց անենք, որ այլեւս կորուստներ չունենանք, ազգային միասնություն լինի, այլ հերթական ընտրությունների մասին ենք մտածում»,-ասաց նա:

Անդրադառնալով Լոռու մարզ կատարած այցելության ժամանակ վարչապետ Նիկոլ Փաշինյանի վարքին, երբ նա դժգհել էր դպրոցաշինության որակից եւ աշխատանքից ազատել մարզպետին ու քաղաքաշինության կոմիտեի նախագահին, Թեւան Պողոսյանն ասաց. «Երբ կառավարության ղեկավարն է կատարում ստուգողական ֆունկցիաներ, նշանակում է, որ ստուգողական ֆունկցիաներ ունեցող պետական բոլոր ինստիտուտները չեն աշխատել: Փաշինյանը տեսել է երեւացող բաները, իսկ պատի ամրությունը, շենքի հիմքը ամուր է, թե ոչ, արդյոք դրանք համապատասխանում են սեյսմակայունության չափանիշներին, թե ոչ»:

Նրա խոսքով, Նիկոլ Փաշինյանի վարքը ցուցադրություն էր, քաղաքական գովազդ, թեմաների շեղում, ցույց տալու, որ Ամանորը մեզ համար յուրահատուկ տոնական միջոցառումների օր չի, հաջորդ օրվանից աշխատանքի ենք: «Նա մեկ կրակոցով փորձել է մի անի նպատակի հասնել: Հարցն այն է՝ հասա՞վ իր նպատակներին, թե ոչ:

Գնացել եք, տեսել եք, վերացրեք թերությունները, մարդկանց էլ հեռացրեք, ինչո՞ւ եք մեզ դա ցուցադրում: Եթե ավարտական ակտ է եղել, նշանակում է՝ ներքեւից վերեւ ոչ մի համակարգ չի աշխատում, որ եկել հասել է այսօրվան»,- ընդգծեց նա: