Բացահայտվել է Գյումրիում կատարված մոր եւ որդու սպանության դեպքը. Հարվածել են մուրճով ու շշով

Բացահայտվել է Գյումրիում օրերս կատարված մոր եւ որդու սպանության դեպքը:

Ոստիկանության մամուլի ծառայությունից NEWS.am-ին հայտնում են, որ հունիսի 20-ին, ժամը 15.20-ին, ոստիկանության Երեւան քաղաքի վարչության օպերատիվ կառավարման կենտրոնից ոստիկանության Մուշի բաժնում հաղորդում էր ստացվել, որ իրենց է զանգահարել Գյումրիի բնակչուհի Ռիտա Հ.-ն եւ հայտնել, որ Գյումրիի Ֆանտաններ թաղամասում բնակվող իր ամուսնու հարեւաններն իրեն հայտնել են, որ մի քանի օր է մայրը եւ որդին չեն արձագանքում եւ նրանց տնից տհաճ հոտ է գալիս:

Ահազանգով դեպքի վայր մեկնած օպերատիվ խումբը Մանուշյան փողոցի թիվ 228/268 տնակում հայտնաբերել է 80-ամյա Սիրիկ Հակոբյանի եւ 56-ամյա Սարգիս Հակոբյանի դիակները:

Հունիսի 21-ին ստացված դատաբժշկական եզրակացության համաձայն՝ նրանց մահը վրա էր հասել «փակ գանգուղեղային վնասվածքի» հետեւանքով:

Փաստի առթիվ հունիսի 21-ին հարուցվել է քրեական գործ` ՀՀ քրեական օրենսգրքի 104 հոդվածի 2-րդ մասի 1-ին կետի հատկանիշներով:

Ձեռնարկաված օպերատիվ-հետախուզական եւ քննչական անհետաձգելի միջոցառումների եւ որոնողական լայնածավալ աշխատանքների շնորհիվ պարզվել է, որ հունիսի 17-ին, ժամը 20.30-ի սահմաններում, նշված տնակում, վիճաբանության ժամանակ, Սիրիկ եւ Սարգիս Հակոբյաններին մուրճով եւ ապակե տարաներով հարվածել եւ սպանել է Գյումրի քաղաքի բնակիչ, նախկինում դատված, 41-ամյա Գոռ խաչատրյանը:

Գոռ Խաչատրյանը ձերբակալված է:

Քննությունը շարունակվում է: