«Չալաբյանին փորձում են հեռու պահել քաղաքական գործընթացներից»․ փաստաբանը վճռի դեմ բողոք կներկայացնի

Հասարակական–քաղաքական գործիչ Ավետիք Չալաբյանի վերաբերյալ կայացված դատավճռի դեմ փաստաբանները Վերաքննիչ քրեական դատարան բողոք կներկայացնեն։

«Ամբողջ դատաքննության ընթացքը ցույց է տվել պաշտպանական կողմի հստակ եւ սպառիչ դիրքորոշումը այս ամենի հետ կապված, թե ինչ է կատարվում այս մեկ տարի եւ ավելի ժամանակահատվածում, ինչ նպատակ էր հետապնդում այս ամենը։ Մեր կանխատեսումներն ու ենթադրությունները, թե որտեղ է տանում այս ամենը, իրականացան վերջնական դատավճռով, որովհետեւ Չալաբյանին փորձում են հեռու պահել քաղաքական գործընթացներից, որպեսզի նա չմասնակցի որեւէ հավաքի կամ համանման միջոցառման։ Ի սկզբանե այստեղ քրեական գործ չի եղել»,- լրագրողների հետ զրույցում ասաց Չալաբյանի փաստաբանը։

Նշենք, որ Երեւանի ընդհանուր իրավասության դատարանը՝ նախագահությամբ դատավոր Մնացական Մարտիրոսյանի, այսօր՝ դեկտեմբերի 21-ին, հասարակական–քաղաքական գործիչ Ավետիք Չալաբյանի վերաբերյալ կայացրել է դատավճիռ այն մասին, որ Չալաբյանի ազատությունը սահմանափակվում է 1 տարի 11 ամիս 5 օր ժամկետով։

Հիշեցնենք, որ Ավետիք Չալաբյանը մեղադրվում է անձանց հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու մեջ:

2022 թվականի մայիսի 9-ին լրատվական կայքերից մեկում ձայնագրություն էր հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Քննչական կոմիտեի փոխանցմամբ՝ քննությամբ պարզվել էր, որ ենթադրյալ հանցագործությունը կատարած անձինք քաղաքական ընդդիմության կողմից կազմակերպվող հավաքներին մասնակցելու եւ որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 դրամ գումար: Գործով մեղադրանք էր առաջադրվել Ավետիք Չալաբյանին եւ Ագրարային համալսարանի դասախոս Էմմա Սարգսյանին: