Զորակոչից 3 ամիս չանցած 18-ամյա Ռոլանդին բարձրացրել են դիրքեր. Նա 6 վիրահատության է ենթարկվել
ՊԱՏՄՈՒԹՅԱՆ ԱՅՍ ՕՐԸ
Թալիշում ապրիլի 4-ին ծանր վիրավորված Ռոլանդ Սահակյանը բանակ է զորակոչվել այս տարվա հունվարի 8-ին: Թեեւ օրենքով առաջնագիծ կարող են մեկնել 6 ամիս բանակում ծառայած տղաները, ապրիլի 2-ին հրամանատարը դիրքեր է ուղարկում նաեւ Ռոլանդին, որն ընդամենը երեք ամսվա զինծառայող էր: Ապրիլի 4-ին տղան ծանր վիրավորվում է եւ տեղափոխվում նախ Ստեփանակերտ, ապա Երեւան:
Կենտրոնական զինվորական կլինիկական հոսպիտալի բժիշկներն արդեն 2,5 ամիս պայքարում են տղային բուժելու համար:
«Զարմանում եմ` ոնց են երեք ամսվա զինծառայողին դիրքեր տարել: Նման բան առաջին անգամ եմ լսում: Առողջ տղայիս բանակ եմ ուղարկում, երեք ամիս հետո տեղափոխում են Երեւան` առաջին կարգի հաշմանդամություն ստացած»,- ասում է հայրը` Քաջիկ Սահակյանը:
Այս ընթացքում երիտասարդը 6 վիրահատության է ենթարկվել` երկու թոքերի, լեղապարկի, լյարդի, 12-մատնյա աղիքի եւ ողնաշարի: Այսօր Ռոլանդն արդեն կարողանում է ինքնուրույն ուտել:
Իհարկե, նա մինչեւ հիմա բարձր ջերմություն ունի, սակայն ձեռքերը նորմալ աշխատում են. ողնաշարի վնասվածքը դրանց վրա չի ազդել: Ռոլանդին մկանները մերսող մասնագետ է այցելում, որոնք երկար ժամանակ պառկելու արդյունքում թուլանում են եւ կորցնում տոնուսը:
«Մինչեւ հիմա վերակենդանացման բաժանմունքում է, բժիշկները հորդորում են սպասել»,- նշում է հայրը:
Ռոլանդն Արմավիրի մարզից է, ծնողները գյուղատնտեսությամբ են զբաղվում: Ամեն օր Սահակյանները տաքսիով գալիս են Երեւան, վերադառնում: Ռուսաստանից վերադարձել է նաեւ Ռոլանդի հորեղբայրը, քանի որ Քաջիկ Սահակյանը չի հասցնում այգու աշխատանքները:
«Մեր ապրուստի միակ միջոցը գյուղատնտեսությունն է: Հիմա հատկապես աշխատանքը շատ է, ստիպված եղբայրս եկել է, որ օգնի»,- նշում է հայրը:
Սահակյանները ոչինչ չգիտեն Ռոլանդին արտասահման տանելու հետ կապված քննարկումների մասին:
Հիշեցնենք, որ Կենտրոնական զինվորական հոսպիտալի ղեկավար Արամ Ասատուրյանն ավելի վաղ NEWS.am-ի թղթակցին պատմել էր, որ բանակցություններ են վարում՝ Ռոլանդ Սահակյանի եւ Ավետիս Զարգարյանի բուժումն արտերկրում շարունակելու շուրջ:
«Մեզ ոչ ոք այդ մասին չի ասել, չգիտենք, որ նման հարց է քննարկվում»,- հավելում է Քաջիկ Սահակյանը:
Ռոլանդ Սահակյանին օգնելու համար Քաջիկ Սահակյանի անունով բացվել է հաշվեհամար ՎՏԲ բանկում.
4033190010611350
Հիշեցնենք, որ քառօրյա պատերազմից հետո Հայաստանի կառավարությունը որոշում ընդունեց այն մասին, որ այն վիրավորները, որոնց Հայաստանում չեն կարողանում անհրաժեշտ օգնություն ցուցաբերել, պետության միջոցների հաշվին կտեղափոխվեն արտերկիր՝ բուժման: Առայսօր ոչ մի զինծառայողի պետությունն իր միջոցներով արտասահման չի տեղափոխել:
