Ծանոթ ու միաժամանակ անհայտ … քող
ՖՈՏՈ
Երևի նորաձևության արդյունաբերությունը չգիտի կանացի ավելի առեղծվածային աքսեսուար, քան քողն է։ Այն թաքցնելով դեմքը անծանոթներից յուրօրինակ հմայքով ու նրբագեղությամբ է լցնում կնոջ կերպարը։ Այսպիսով, ո՞րն է այդ գլխազարդի առեղծվածը: Ինչպե՞ս է քողը գերել հարյուր հազարավոր նորաձևության սիրահարների ամբողջ աշխարհում:
Ենթադրաբար, քողի պատմությունը սկսվել է Արևելքից, որտեղ կանայք ստիպված էին թաքցնել իրենց դեմքերը։ Քողը ծառայում էր որպես փարանջա, որը կրում էին կրոնական կամ դասակարգային պատկանելությունը ցույց տալու համար։ Շուտով այդ գլխազարդը լայն տարածում է գտել աշխարհի այլ ծայրերում՝ Եգիպտոսում, Հռոմում, Ասիայում և Հունաստանում։ Քողը Եվրոպա է մտել երկու խորհրդանշական գույներով՝ սպիտակ քողը որպես մաքրության և անմեղության խորհրդանիշ, և սև քողը որպես սգի և տխրության: Ենթադրաբար 14-15-րդ դարերում քող կրում էին ոչ միայն կանայք, այլ նաև մարդկության ուժեղ կեսն այն ամրացնելով գլխարկներին։ Սակայն, ցավոք, դրա ապացույցները չեն պահպանվել։
19-րդ դարում քողի նորաձևության նոր բեկում է տեղի ունեցել: Որոշ տիկնայք սկսել են լայնեզր գլխարկներին կպցնել մեծ անցքերով ցանց-քողեր: Հետո նորաձևության մեջ են մտել կոկիկ փոքրիկ գլխարկները, որոնց վրա և ամրացված էին բարակ գործվածքից քողեր։ 20-րդ դարի 40-ական թվականներին դասական քողը նոր մրցակից է ունեցել՝ վուալետկան։ Դրանք պատրաստվում էին ավելի հաստ գործվածքից՝ ժանյակակար հավելումներով։ Այդ գլխազարդը նույնպես հարուստ զարդարում էին փետուրներով և ուլունքներով։ Հետագայում 60-ականներին քողը ձեռք է բերել առավելագույն ժողովրդականություն կանանց շրջանում։ Այդ ժամանակ է հայտնվել հաբ-գլխարկը, և ճակատը ծածկող քողի հետ միասին այդ գլխազարդն իսկապես շքեղ տեսք է ունեցել։
Ներկայումս անցյալ ժամանակներից ծանոթ տեսքով գլխարկներին ամրացված քողերը կորցրել են իրենց ժողովրդականությունը։ Իհարկե, ներկայումս ամբողջ աշխարհում է ընդունված ամուսնությունների ժամանակ օգտագործել հարսնաքողը, և թեկուզ միայն այդ պատճառով կարելի է փաստել, որ քողը մոռացված չէ: Այնուամենայնիվ, ցանց-քողը ևս չի մոռացվել: Նորաձևության դիզայներներն առաջարկում են հասարակ գլխարկները համադրել ցանցային քողերի հետ։ Հայտնի մարդիկ ևս անմասն չեն մնում դրանից. համացանցում կարելի է գտնել Լեդի Գագայի և Ռիհաննայի լուսանկարներն այդ առեղծվածային աքսեսուարով: Բացի դա Մերիլին Մոնրոն՝ միլիոնների սեքս-խորհրդանիշը ևս համարվում էր քողի մոլի երկրպագու։ Համադրելով քողը կիսասպորտային ոճի, վերարկուի և հարթ կոշիկների հետ կանայք գրավիչ տեսք են ստանում, իսկ քողն առեղծված և հմայք է ավելացնում։
Կ. Խաչիկյան
