Ադրբեջանը Եվրամիության հետ մի շարք համատեղ նախագծեր է կասեցրե

Պաշտոնական Բաքուն կասեցրել է Եվրամիության հետ մի շարք համատեղ նախագծեր, հայտնում են ադրբեջանական լրատվամիջոցները՝ վկայակոչելով դիվանագիտական ​​աղբյուրներին։

«Խոսքը, այսպես կոչված, Twinning նախագծերի մասին է, որի շրջանակներում եվրոպացի պաշտոնյաներն Ադրբեջանի պետական ​​կառույցներին «հանձնարարել են», թե ինչպես պետք է աշխատեն եվրոպական չափանիշներին համապատասխան։ Այս սխեման գործում է այսպես. ԵՄ երկրից Twinning խորհրդատու է ուղարկվում շահառու երկրի համապատասխան պետական ​​գործակալություն՝ ծրագրի իրականացման ողջ ժամանակահատվածի համար՝ 12-ից 36 ամիս ժամկետով և համակարգում է դրա գործունեությունը: Twinning ծրագրի աշխատանքային պլանը սովորաբար ներառում է կարճ և միջնաժամկետ փորձագիտական ​​առաքելություններ և ուսումնական միջոցառումներ:

Հատկանշական է, որ այդ նախագծերի մեծ մասի առաջնագծում Լիտվան էր՝ «Ֆրանսիայից հետո ամենաբուռն հայամետ և հակաադրբեջանական դիրքորոշում ցուցաբերող պետությունը»։ Այսպիսով, Ադրբեջանը դադարեցրեց Լիտվայի հետ երեք համատեղ նախագիծ՝ իրավապահ, առողջապահական և սոցիալական ապահովության ոլորտում»,- գրում են ադրբեջանական աղբյուրները։

«Շատ դեպքերում Լիտվայի ներկայացուցիչների ակտիվությունն ու հետաքրքրասիրությունը կառավարության գործունեության այս առանցքային ոլորտներում հատել են համագործակցության սահմանը և կասկածներ առաջացրել»,- իր գնահատականն է կիսել աղբյուրը։ Դադարեցվել է նաև միգրացիայի ոլորտում Շվեդիայի և Հունաստանի հետ Twinning ծրագիրը։

Միակ բացառությունն ադրբեջանական կողմից արվել է Լեհաստանի և Ֆինլանդիայի հետ նախագծերի համար՝ «այդ երկրների հավասարակշռված դիրքորոշման պատճառով»։

«Նման նախագծերը հավանաբար իմաստ ունեին 90-ականներին և 2000-ականների սկզբին, սակայն 2023 թվականին, երբ Ադրբեջանն ամուր կանգնած է իր ոտքերի վրա, «ուսուցիչ-աշակերտ» հարաբերությունները Եվրամիության հետ հարաբերություններում Բաքվի համար ընդունելի չեն։ Ավելին, նման համագործակցությունը հնարավոր չի թվում՝ հայկական անջատողականության պահապան Ժոզեպ Բորելի ուղարկած «նախազգուշացումների» և «հստակ ազդանշանների» ֆոնին։

Ինչ վերաբերում է օտարերկրյա պետությունների պետական ​​կառույցների հետ վարչարարության որակը բարելավելու փորձի փոխանակմանը, ապա պետք է հիշել, որ երկկողմ շփումները բարեկամ եվրոպական երկրների հետ չեն չեղարկվել։ Ավելին, Ասիայի որոշ բարձր տեխնոլոգիական երկրներ վաղուց առաջ են անցել ԵՄ-ից թե՛ թվայնացման մակարդակով, թե՛ վարչական բարեփոխումների արդյունավետությամբ։ Այնպես որ, պաշտոնական Բաքուն գործընկերներ կգտնի, բայց ներքին կառավարման հարցերում ԵՄ-ի հետ ինստիտուցիոնալ համագործակցությունը, ըստ ամենայնի, գալիս է իր տրամաբանական ավարտին»,- ասել է աղբյուրը։