««Վակուումում». որտե՞ղ կհայտնվի Հայաստանը, եթե դուրս գա ԱՊՀ-ից և ՀԱՊԿ-ից»
ՎԵՐԼՈՒԾՈՒԹՅՈՒՆՆԵՐ
News.ru-ն գրում է, որ Հայաստանը Ֆրանսիայից ստացել է Bastion զրահատեխնիկայի խմբաքանակ, որոնք, ըստ Ouest France-ի, մերժվել էին Ուկրաինայի կողմից վատ անվտանգություն ունենալու պատճառով։ Մոսկվային, որի թիկունքում Երևանը ռազմական գործարքներ է կնքում արևմտյան երկրների հետ, ամենայն հավանականությամբ դուր չի եկել ՀԱՊԿ իր դաշնակցի այդ պահվածքը։ Միաժամանակ հայկական ԶԼՄ-ները հայտնում են ՀԱՊԿ-ից և ԱՊՀ-ից դուրս գալու Հայաստանի իշխանությունների ծրագրերի մասին։ Ինչպե՞ս և ինչո՞ւ է Հայաստանը փոխում իր արտաքին քաղաքական ուղղվածությունը և ո՞ւր կտանի դա:
Ռուսաստանի և Հայաստանի հարաբերությունների սառեցումը անհանգստացնում է հասարակ հայերին, սակայն իշխանություններին, ըստ ամենայնի, դա բոլորովին չի հետաքրքրում, NEWS.ru-ի հետ զրույցում ասել է հայ քաղաքագետ Թևան Պողոսյանը։ Նրա խոսքով, Փաշինյանն ու իր շրջապատը Մոսկվայի հետ շփվելու ուղիներ փնտրելու փոխարեն «պարզ չէ, թե ինչ են անում», իսկ Արևմուտքը փորձում է օգտագործել նման հնարավորությունը։ «Ես չգիտեմ, թե ինչ է պատրաստվում անել այս կառավարությունը: Հասկանալի է, որ կան լուրջ խնդիրներ, որոնք լուծման կարիք ունեն։ Բայց երկրների ղեկավարները միմյանց մեղադրելուց բացի ոչինչ չեն անում։ Ո՛չ ռուսական, ո՛չ հայկական կողմը շահագրգռված չեն խնդիրների կարգավորմամբ»,- ասել է Պողոսյանը։
Քաղաքագետի խոսքով Հայաստանում չեն պաշտպանում երկրի արտադաշնակցային կարգավիճակի գաղափարը, քանի որ պարզ չէ, թե հետո ինչպես այն կապահովի անվտանգությունը։ Միաժամանակ, Պողոսյանը բացառել է, որ Հայաստանը կմտնի ՆԱՏՕ, քանի որ դրա համար անհրաժեշտ է Ռուսաստանի և Ադրբեջանի հետ լավ հարաբերություններ ունեցող Թուրքիայի թույլտվությունը։ «Անկարան դա թույլ չի տա»,- նկատել է քաղաքագետը։
Հայաստանում այժմ իշխանության ղեկին գտնվող մարդիկ ի սկզբանե են հղացել փոխել արտաքին քաղաքական ուղղվածությունը, բայց հասկացան, որ հնարավորություն չունեն նման կտրուկ շրջադարձ կատարելու, ուստի գործում են աստիճանաբար: Այդ մասին NEWS.ru-ի հետ զրույցում ասել է Հայաստանի Դեմոկրատակաան կուսակցության առաջնորդ Արամ Սարգսյանը։ «Հայեցակարգային փոփոխություններ են պետք։ Մենք հիշում ենք, թե ինչ եղավ Ուկրաինայի, Մոլդովայի և Վրաստանի հետ: Եթե ամեն ինչ ընթանա այնպես, ինչպես նախատեսված է, ապա Հայաստանին սպասվում է նույն սցենարը։ Մենք ազգովի պետք է համախմբվենք, բայց այսօր, ցավոք, դա չկա»,- խոստովանել է Սարգսյանը։
Հայաստանի ներկայիս իշխանությունը ձգտում է ինտեգրվել Արևմուտքի հետ, բայց գիտակցելով, որ դրա համար տասնամյակներ կպահանջվեն, որոշել է միջանկյալ փուլն իրականացնել որպես չմիավորված պետություն, NEWS.ru-ին պարզաբանել է Կովկասի ինստիտուտի գիտաշխատող Հրանտ Միքայելյանը։ Դա, ըստ քաղաքագետի, լուրջ ռիսկերով է հղի Երևանի համար: «Ռուսական ազդեցությունից դուրս գալու ծրագիրն ի սկզբանե է եղել Հայաստանի իշխանությունների մոտ։ Ղարաբաղյան պարտությունն ընդամենը պատրվակ էր: Հայաստանը վտանգում է կորցնել ռուսական անվտանգության գոտին չստանալով արևմտյան գոտին: Այսինքն Հայաստանի անվտանգությունը կարող է հայտնվել վակուումի մեջ»,- ասել է Միքայելյանը։
Նյութը հրապարակման պատրաստեց Կամո Խաչիկյանը
