Ճապոնիան նախազգուշացրել է, որ Մերձավոր Արևելքում հակամարտությունը կարող է ազդել իր տնտեսության վրա

Ճապոնիայի կառավարությունը նախազգուշացրել է, որ Մերձավոր Արևելքում հակամարտությունը կարող է ազդել իր տնտեսության վրա՝ էներգիայի ծախսերի պատճառով, հայտնում է Reuters-ը։

Մտահոգություններն ընդգծում են քաղաքական գործիչների անհանգստությունը, քանի որ էներգակիրների գների աճն արդեն իսկ բեռ է աշխարհի երրորդ խոշոր տնտեսության համար, որն իր էներգետիկ կարիքների մեծ մասը բավարարելու համար ապավինում է ներմուծմանը:

Մերձավոր Արևելքում զարգացումները գործոններ են, որոնք մեծ ուշադրություն են պահանջում, քանի որ դրանք «կարող են ստեղծել ճապոնական տնտեսության վատթարացման վտանգ», ասել է նախարարների կաբինետի ներկայացուցիչը: «Ներմուծման ծախսերի ավելացումը կարող է բացասական ազդեցություն ունենալ ճապոնական տնային տնտեսությունների, սպառման և կորպորատիվ եկամուտների վրա», - նշել է նա:

Ճապոնիայի կառավարության ամենամսյա զեկույցը նաև վերահաստատում է ֆինանսական և կապիտալի շուկաներում գների աճի և տատանումների ազդեցությանը մեծ ուշադրություն դարձնելու անհրաժեշտությունը:

Ճապոնական արժույթը վերջերս նվազել է մինչև 150 իեն մեկ դոլարի դիմաց և հասել է ամենացածր մակարդակին 2022 թվականի հոկտեմբերից ի վեր:

Զեկույցի համաձայն՝ Ճապոնիան հուլիսից ի վեր առաջին անգամ բարձրացրել է գործարար տրամադրությունների իր գնահատականը և ասել, որ ընդհանուր իրավիճակը «չափավոր բարելավվում է»:

Կառավարությունը նաև զգուշավոր է մնացել համաշխարհային դրամավարկային քաղաքականության խստացման հետևանքով առաջացած նվազման ռիսկերի և Չինաստանի տնտեսական հեռանկարների վերաբերյալ մտահոգությունների վերաբերյալ: