Էրդողանն Արևմուտքին պատերազմով է սպառնացել. մենք լի ենք նույն վճռականությամբ, ինչ Լիբիայում, Ղարաբաղում

Թուրքիայի նախագահ Ռեջեփ Թայիփ Էրդողանը շաբաթ օրը Ստամբուլում պաղեստինամետ մեծ ցույցի ժամանակ ասել է, որ Իսրայելը դատապարտված է մենակ մնալու` ՄԱԿ-ում Գազայի հատվածի վերաբերյալ բանաձևի քվեարկության ֆոնին, և հարց է տվել, թե արդյոք Արևմուտքը ցանկանում է «խաչի և կիսալուսնի» պատերազմ: 

Ավելի վաղ, ՄԱԿ-ի Գլխավոր ասամբլեան ընդունել էր արաբական երկրների բանաձեւը, որը կոչ էր անում անհապաղ զինադադար հաստատել պաղեստինա-իսրայելական հակամարտության գոտում, որը կտանի ռազմական գործողությունների դադարեցմանը։ Փաստաթղթին կողմ է քվեարկել 120 երկիր, դեմ՝ 14, ձեռնպահ՝ 45։

«Արևմուտք, ես դիմում եմ ձեզ։ Դուք ցանկանու՞մ եք նոր պատերազմ սկսել խաչի և կիսալուսնի միջև։ Եթե ​​սրա համար նման ջանքեր եք գործադրում, ուրեմն իմացեք, որ այս ժողովուրդը չի մահացել, նա ամուր կանգնած է իր ոտքերի վրա։ Մենք լցված ենք նույն վճռականությամբ, ինչ Լիբիայում, Ղարաբաղում, իմացեք, որ մենք նույնն ենք Մերձավոր Արևելքում»,- հանրահավաքի ժամանակ ասել է Էրդողանը՝ պաղեստինյան քեֆիեհը վզին դրած: Նրա խոսքով՝ Աթաթուրքի անվան օդանավակայանում հանրահավաքի մասնակիցների թիվը կազմել է մոտ 1,5 միլիոն։

Մեկնաբանելով ՄԱԿ-ում քվեարկությունը՝ Էրդողանը նշել է, որ միայն «13-14 երկրներ են աջակցել Իսրայելի դիրքորոշմանը»։ «Ուրեմն, Իսրայել, դու դատապարտված ես աշխարհում մենակ մնալու, և սրանից հետո ինչ էլ անես, դատապարտված ես լինելու։ ՄԱԿ-ը լավ քայլ արեց՝ ընդունելով այս բանաձեւը»,- նշել է Թուրքիայի նախագահը։ Էրդողանը դժգոհել է ընդդիմության անդամներից, ովքեր ՀԱՄԱՍ-ին ահաբեկիչներ են համարում և նրանցից, ովքեր քվեարկում են այդ քաղաքական գործիչների օգտին։ Նա կրկնեց, որ, իր կարծիքով, Իսրայելն է իրեն խմբավորման նման պահում, իսկ ՀԱՄԱՍ-ն ահաբեկիչներ չեն։