Ըստ Փաշինյանի, Հայաստանը նոր գործընկերներ է փնտրում

Վարչապետի պաշտոնը զբաղեցնող Նիկոլ Փաշինյանը երեկ հարցազրույց է տվել ամերիկյան «Wall Street journal» պարբերականին և ծավալուն հարցազրույցի մեծ մասը նվիրել կրկին Ռուսաստանի քննադատությանը։ Ըստ Փաշինյանի՝ Հայաստանը նոր գործընկերներ է փնտրում, քանի որ Մոսկվան ձախողել է իրագործել դաշնակցային պարտավորությունները։ «Այս իրադարձությունները մեզ հանգեցրին որոշման, որ կարիք ունենք դիֆերսիֆիկացնել մեր հարաբերություններն անվտանգության ոլորտում և հիմա փորձում ենք դա անել»,-ասել է Փաշինյանը։

Դիտարկմանը, թե՝ «Հայաստանում ռուսական ռազմական ներկայացուցչություն գոյություն ունի», Փաշինյանը պատասխանել է, թե դրա մեջ որևէ առավելություն չեն տեսնում։ Նիկոլ Փաշինյանը նաև քննադատել է ռուսական պաշտոնական շրջանակներին, մասնավորապես նախկին նախագահ Դմիտրի Մեդվեդևին՝ իր հասցեին վիրավորական հայտարարությունների համար։ «Նման մոտեցումը խախտում է բազմաթիվ կանոններ, միմյանց ներքին գործերին չմիջամտելուց և դիվանագիտական կոռեկտությունից սկսած»,- ասել է նա։

Ի դեպ, Կրեմլի պաշտոնական ներկայացուցիչ Դմիտրի Պեսկովն է արձագանքել Փաշինյանի հայտարարություններին, «Իներֆաքսի» հետ զրույցում նշել, թե Կրեմլին հայտնի չեն Հայաստանի վարչապետ Նիկոլ Փաշինյանի այն խոսքերը, թե Հայաստանում ռուսական բազայի առկայությունն առավելություններ չի տալիս։ «Մենք դեռ չգիտենք արդյոք նա ասել է այդ խոսքերը ու, եթե ասել է, ապա որտեղ և ինչ համատեքստում»,- նշել է Պեսկովը։

Այդուհանդերձ, Փաշինյանը խոսել է ոչ միայն Ռուսաստանից, այլ նաև Ադրբեջանի հետ կնքվելիք խաղաղության պայմանագրից, ընդգծել, որ չնայած Ադրբեջանը հրաժարվել է հոկտեմբերի վերջին Բրյուսելում նախատեսված հանդիպումից, Փաշինյանը պնդել է, թե լավատես է մնում առաջիկա ամիսներին Ադրբեջանից խաղաղության պայմանագիր կնքելու հարցում։ «Տարածաշրջանի ապագան պետք է լինի տևական ժամանակ, փակ սահմանների ու առևտրային ուղիների, այդ թվում Թուրքիան և Ադրբեջանը կապող ճանապարհի բացումը, եթե այն հարգում է Հայաստանի իշխանությունը, անվտանգությունը պետք է ձեռք բերվի ոչ միայն բանակով, այլև տարածաշրջանային խաղաղությամբ»,- հերթական անգամ իր կեղծ «խաղաղության դարաշրջանի» օրակարգն է առաջ մղել Փաշինյանը։ 

Աննա Մարգարյան