Փաշինյանն իրար դեմ է հանում արցախցիներին

Դեռ օրեր առաջ գրել էինք, որ Նիկոլ Փաշինյանը Հայաստան տեղահանված արցախցիներից վտանգը չեզոքացնելու ձև է մշակել. կոնֆլիկտ է առաջացնում հենց արցախցիների շրջանում, նրանց իրար դեմ հանում և այդ կերպ իրականացնում իր գարշելի մտադրությունը։

Ինչպես և սպասելի էր, երեկ հենց այդ կոնֆլիկտի առաջին դրսևորումները տեղի ունեցան Երևանում՝ Արցախի ներկայացուցչության մոտ։ Մի քանի տասնյակ ագրեսիվ տրամադրված անձինք հավաքվել էին շենքի դիմաց և պատասխաններ էին պահանջում Արցախի նախագահ Սամվել Շահրամանյանից և այլ պաշտոնյաներից։

Հավաքվածները երկու անգամ ներխուժեցին ներկայացուցչության տարածք, քաշքշուկ սարքեցին՝ պահանջելով, որ Սամվել Շահրամանյանը հրապարակային պատասխանի իրենց հարցերին։ Արցախի նախագահը քանիցս նշեց, որ չի կարող բաց ասել բաներ, որոնք կարող են վտանգել ոչ միայն Արցախի հարցը, այլ նաև Հայաստանի Հանրապետությունը, խնդրեց փոքր պատվիրակություն գա և դռնփակ, առանց լրագրողների ներկայության պատասխանի հարցերին, ավելին ասաց, որ պատրաստվում է առաջիկայում մեծ հարցազրույց տալ Հանրային հեռուստաընկերությանը։

Մի քանի ժամ տևած այդ «բողոքի ակցիայի» ընթացքում տեղի ունեցան նաև ծեծկռտուքի դեպքեր, Արցախի նախագահի աշխատակազմի ղեկավար Կարեն Շահրամանյանին հարվածներ հասցրեցին, պատռեցին հագուստը։

Մեր աղբյուրների փոխանցմամբ՝ այս միջադեպն ի սկզբանե էր կազմակերպված և հրահրված էր եղել Նիկոլ Փաշինյանի և նրա խամաճիկ դարձած Սամվել Բաբայանի կողմից։ Արցախի Ազգային ժողովի փոխնախագահ, Բաբայանի «Միասնական Հայրենիք» կուսակցության անդամ Գագիկ Բաղունցը Արցախի ներկայացուցչություն էր հրավիրել Արցախի Ազգային ժողովի խմբակցությունների ղեկավարներին, Սամվել Շահրամանյանին և պետնախարար Արթուր Հարությունյանին՝ ասելով, որ մի խումբ արցախցիներ հանդիպում են խնդրել քննարկելու հետագա անելիքները։

Իհարկե, մի քանիսը չեն ներկայացել՝ տեղեկություն ունենալով, թե ինչ է կատարվում, մյուսներն էլ չափազանց տհաճ իրավիճակում էին հայտնվել։ Առաջիկայում ևս, Բաբայանն ու իր կողմնակիցները մտադիր են նոր բախումներ հրահրել, դրա համար օգտագործելով իշխանության տարածած թեզերը և այդ կերպ արցախցիների մեջ «սև կատու» գցել, որպեսզի հնարավորություն ունենան լավամարդ դառնալ Նիկոլ Փաշինյանի մոտ։

Անի Գևորգյան