Արցախի իշխանությունները վճռական են՝ պահպանելու սուբյեկտայնությունը

Արցախն ամբողջությամբ հայաթափվել է, սակայն Արցախի իշխանությունները որոշել են պահպանել պետական իշխանության մարմինները՝ դրանով ուղերձ հղելով ոչ միայն միջազգային հանրությանը, այլև փաշինյանական վարչախմբին, որը բոլոր ջանքերը գործադրում էր Արցախի պետական կառավարման մարմինները կասեցնելու և պատմության գիրկն ուղարկելու համար։

Հաշվի առնելով սեպտեմբերի 20-ից հետո Արցախի շուրջ ստեղծված իրավիճակը՝ Լեռնային Ղարաբաղի նախագահ Սամվել Շահրամանյանը ստորագրել է հրամանագիր, համաձայն որի 2023 թվականի հոկտեմբերի 1-ից պետական և համայնքային հիմնարկների, պետության և համայնքների կողմից հիմնադրված, ինչպես նաև դրանց մասնակցությամբ կազմակերպությունների, պետության և համայնքների կողմից ստեղծված հիմնադրամների աշխատողները համարվում են ազատված զբաղեցրած պաշտոններից՝ բացառությամբ ղեկավար և բարձրաստիճան պաշտոնյաների, պատգամավորների և դատավորների:

Հրամանագրում նշված են այն պաշտոնյաները, որոնք շարունակելու են պաշտոնավարել հասարակական հիմունքներով՝ առանց վարձատրության: Հայաստանի գործող վարչախումբը միջոցներ չի հատկացնելու արցախցի պաշտոնյաներին, ավելին, որոշ շրջանակների դրդմամբ ցանկանում են խլել Երևանում Արցախի ներկայացուցչությունը և այլ վարչական տարածքները, մինչդեռ բազմաթիվ քաղաքագետներ արձանագրում են, որ առնվազն պետական մարմինների պահպանումը չափազանց կարևոր ուղերձ է պարունակում։

Մեր աղբյուրների փոխանցմամբ, Փաշինյանը նաև մտադիր է առաջիկայում քրեական գործեր հարուցել մի շարք արցախցի պաշտոնյաների, բարձրաստիճան զինվորականների դեմ՝ փորձելով նրանց վրա բարդել պարտության և Արցախի տոտալ հայաթափման մեղքը, հատկապես, որ այդ գործում բավական հաջողված օրինակ ունի՝ ի դեմս 44-օրյա պատերազմի հանգամանքները քննող խորհրդարանական հանձնաժողովի։ 

Կարեն Սիմոնյան