Սամվել Բաբայանը Փաշինյանի հրահանգով արշավ է սկսել Արցախի պաշտոնյաների դեմ
ՎԵՐԼՈՒԾՈՒԹՅՈՒՆՆԵՐ
Արցախի անվտանգության խորհրդի նախկին քարտուղար Սամվել Բաբայանի հայտարարությունների ու հաղորդման հետքերով քրեական գործ է հարուցվել։ Գլխավոր դատախազության փոխանցմամբ՝ քրեական գործի հիմքում երկու հոդված է՝ զինվորական անփութություն և հակառակորդին զինտեխնիկայի հանձնում։
Սամվել Բաբայանը օրեր առաջ Հանրային հեռուստաընկերությանը սենսացիոն հարցազրույց էր տվել, նաև հաղորդում ներկայացրել հանցագործության մասին։ Ղարաբաղի դեմ Ադրբեջանի ռազմական հարձակումից հետո Սամվել Բաբայանն անարգել հատել էր Հակարիի կամուրջը, թեև տասնամյակներ շարունակ հետախուզվում է Ադրբեջանի կողմից՝ «իբր առաջին պատերազմի ժամանակ կատարած հանցանքների համար»։ Հասնելով Երևան նա հարցազրույց էր տվել՝ քննադատելով արցախում մնացած պաշոնյաներին, նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին և Սամվել Շահրամանյանին, նախկին պետնախարար Ռուբեն Վարդանյանին, Ազգային ժողովի նախագահ Դավիթ Իշխանյանին և այլոց՝ նրանց մեղադրելով Արցախի հանձնման մեջ։
Բաբայանը նաև հայտնի է դարձել նրանով, որ գրեթե ինքնագլուխ բանակցություններ է վարել Ադրբեջանի հետ՝ 23 կետից բաղկացած ինչ-որ փաստաթուղթ քննարկել։ Թե ի՞նչ կետեր են դրանք՝ նա չի մանրամասնում, միայն թե պնդում է, որ այդ կետերը համաձայնեցրել է Արցախի նախկին նախագահ Արայիկ Հարությունյանի հետ։ Հարությունյանը և Արցախի բազմաթիվ այլ նախկին պաշտոնյաներ, ում Սամվել Բաբայանը անվանարկում է և մեղադրում է հանցագործությունների մեջ, այսօր Բաքվի բանտերում են՝ ի տարբերություն Սամվել Բաբայանի, իսկ Արցախի 5-րդ նախագահ Սամվել Շահրամանյանն էլ հարկ չի համարում պարզաբանել իր հասցեին հնչող մեղադրանքները։
Իհարկե, որևէ երաշխիք չկա, որ Հայաստանի գլխավոր դատախազությունը գործը քննելով կբացահայտի իրականությունը, ընդհակառակը, մեծ հավանականությամբ Փաշինյանն այս քրեական գործն օգտագործելու է Արցախից Հայաստան տեղափոխված և իր իշխանության նկատմամբ ընդդիմադիր տրամադրություններ ունեցող գործիչների գլխին անընդհատ մահակ պահելու համար, ուստի և Սամվել Բաբայանն ինչպես իր առաքելությունը իրականացնում էր Արցախում՝ պաշտպանելով փաշինյանական իշխանությանը, այնպես էլ նույն կերպ շարունակում է այստեղ՝ Երևանում։
Սոնա Սահակյան
