Գազայում պաշարված պաղեստինցիները հայտնվել են սովի եւ ջրազրկման սպառնալիքի առջեւ
ՄԻՋԱԶԳԱՅԻՆ
Չդադարող իսրայելական ռմբակոծությունների հետեւանքով շաբաթ օրը Գազայի փռերում վերջացել է հացը, չի բավականացնում խմելու ջուրը, իսկ էլեկտրականության խափանումները ընտանիքներին թողել են առանց հեռախոսների լիցքավորման, որպեսզի իմանան, թե արդյոք անվտանգության մեջ են փախուստի դիմած հարազատները, գրել է Reuters-ը։
Գազայի հարավ մեկնող մարդկանց հոսքը Իսրայելի ուրբաթ օրվա հրամանից հետո հանգեցրել է ռեսուրսների սպառման։
Միավորված Ազգերի Կազմակերպությունը Իսրայելին կոչ է արել «կանխել հումանիտար աղետը» Գազայում՝ 2,3 մլն բնակչություն ունեցող հողի այդ մի պատառիկում, որը սեղմված է Եգիպտոսի, Իսրայելի եւ Միջերկրական ծովի միջեւ։
Ի պատասխան պաղեստինյան ռազմականացված ՀԱՄԱՍ խմբավորման հոկտեմբերի 7-ի հարձակման ՝ Իսրայելը լիակատար շրջափակում է մտցրել՝ դադարեցնելով պարենի մատակարարումը եւ անջատելով Գազայի էլեկտրականությունը։ Մեկ շաբաթ հետո խանութներում վերջացել են շատ ապրանքներ։
Իսրայելը հայտարարել է, որ հրամայել է մարդկանց հեռանալ հյուսիսից հանուն իրենց անվտանգության, եւ որպեսզի չներքաշվեն հակամարտության մեջ։ Հայտարարությունում նշվել է, որ դա կերաշխավորի պաղեստինցիների անվտանգությունը, որոնք ուրբաթ օրը մինչեւ ժամը 16.00-ն (Գրինվիչի ժամանակով ժամը 13.00-ն) կհեռանան այդ շրջանից երկու գլխավոր ճանապարհներով։
Նրանք, ովքեր փախել են, ասում են, որ շատ փողոցներից եւ ճանապարհներից հաճախ դժվար է օգտվել, իսկ որոշներն առհասարակ անանցանելի են վնասվելու պատճառով։
Գազայի իշխանությունները հայտարարել են, որ 70 մարդ սպանվել, 200 հոգի վիրավորվել է, երբ Իսրայելը հարվածներ է հասցրել մարդատար եւ բեռնատար մեքենաներով մարդկանց տեղափոխելու ժամանակ, որոնք փախչում էին հյուսիսից։ Reuters գործակալությունը չի կարողացել հաստատել սա։
ՀԱՄԱՍ-ի հարձակման հետեւանքով զոհվել է ավելի քան 1 300 իսրայելցի։ Զինյալները առեւանգել են տասնյակ պատանդների, որը Իսրայելի պաշտպանության ամենալուրջ խզումն է 1948թ. նրա ստեղծումից հետո։
Զոհերի թիվը Իսրայելի պատասխան գործողությունների հետեւանքով շաբաթ օրը կազմել է ավելի քան 2 200 մարդ։
Եգիպտոսի հետ սահմանը հատելու հնարավորություն չունենալով՝ Գազայի բնակչության մեծ մասը փորձում է գնալ հարավ՝ ապաստարան գտնելու հույսով, քանի որ Իսրայելը զորքեր եւ տանկեր է կուտակում սահմանին ու արդեն ռեյդեր է սկսել։
ՀԱՄԱՍի մամուլի ծառայության տեղեկացմամբ՝ իսրայելական ավիահարվածների հետեւանքով ավերվել է ավելի քան 1 695 շենք եւ աշտարակ, 7 000 միավոր բնակարան։
Էլեկտրաէներգիայի մատակարարման խափանումների եւ գեներատորների աշխատանքի համար վառելիքի բացակայության պատճառով մարդիկ հեռախոսները օրվա լուսավոր ժամերին լիցքավորում են իրենց արեւային մարտկոցներից։
