Պուտինն ու ԱՊՀ ղեկավարները ծաղրում են Փաշինյանին

Ղրղզստանի մայրաքաղաք Բիշքեկում երեկ կայացել է ԱՊՀ-ի երկրների ղեկավարների գագաթաժողովը՝ առանց Նիկոլ Փաշինյանի մասնակցության։ Փաշինյանն օրեր առաջ հրաժարվել էր մասնակցել, ինչին ի պատասխան Վլադիմիր Պուտինի օգնական Յուրի Ուշակովը հայտարարել էր, թե իրենք տեղյակ են, թե ինչու Փաշինյանը չի մասնակցում, իսկ Հայաստանի հարցերը քննարկել են առանց Հայաստանի, ավելին, գագաթաժողովից հետո կայացած մամուլի ասուլիսում Ռուսաստանի նախագահ Վլադիմիր Պուտինը հայտարարել է, թե Հայաստանն ԱՊՀ-ից դուրս չի գալիս, իրենք գագաթաժողովը քննարկել են Փաշինյանի հետ։

Պուտինը նաև հայտարարել է, թե պատրաստ է այցելել Հայաստան։ Օրեր առաջ Ազգային ժողովը վավերացրել էր Հռոմի ստատուտը և, միջազգային այդ փաստաթղթի համաձայն, եթե միջազգային հետախուզման մեջ գտնվող Ռուսաստանի նախագահն այցելի, ապա գործող իշխանությունները պարտավոր են ձերբակալել նրան և հանձնել միջազգային քրեական դատարանի ձեռքը։ Ըստ էության, Պուտինի այս հայտարարությունը նշանակում է, որ իրենք առանձնապես լուրջ չեն համարում, ո՛չ Փաշինյանին, ո՛չ էլ նրա իշխանության ընդունած որոշումները։

Ռուսաստանի նախագահը նաև հերթական անգամ շեշտել է, թե Ղարաբաղը դե ֆակտո դարձել է Ադրբեջանի տարածք, երբ Փաշինյանը հայտարարել է, որ ճանաչում է Ադրբեջանի կազմում Պրահայի գագաթաժողովում։ ԱՊՀ գագաթաժողովից ընդհանրապես պարզ դարձավ, որ Ռուսաստանը պարտադրում է Նիկոլ Փաշինյանին խաղաղության բանակցությունները և պայմանագիրը ստորագրել բացառապես Ռուսաստանի տարածքում՝ Պուտինի առաջարկած պայմաններով, և, մեծ հավանականությամբ, Փաշինյանը ստիպված է լինելու այդպես անել։ Ի դեպ գագաթաժողովում Փաշինյանին անդրադարձել է նույնիսկ Բելոռուսի նախագահ Ալեքսանդր Լուկաշենկոն՝ հայտարարելով, թե Հայաստանը միշտ չէ, որ իրեն գործընկերոջ պես է պահում ԱՊՀ երկրների հետ հարաբերություներում։

Ինչպես և սպասելի էր 44-օրյա պատերազմից հետո Հայաստանը դարձել է «изгой» ոչ միայն Արևմուտքի տարածաշրջանի երկրների, այլ նաև ԱՊՀ երկրների համար, այդպես է լինում ընդհանրապես, երբ պարտված իշխանությանը կրկին թողնում են իշխանության։

Նունե Սահակյան